头条戏场丨《黑的教育》睇人PK最开心

三位高中毕业生喺天台饮住酒吹水，有人提出秘密交换，一个丧一个癫，一个超惊青，然后越玩越大，对于一啲小错变成大错嘅恶作剧有种情意结，睇人PK最开心。当日睇早场嘅我好眼瞓，但越睇越精神，开首30分钟最震撼，全片零冷场，真实邪恶又黑暗，最钟意片长只有77分钟，特别赞好柯震东讲故事能力超强，全片分三章节，清楚易明，作为处男执导，我畀80分。(上映中) 撰文:廖思慧
 

朱轩洋饰演的张博伟人品最差，柯震东讲过最想演佢嘅角色。

三人玩大咗，最终玩出血，知惊但冇得补救了。

柯震东导演指导演员，几有型。

《黑的教育》讲嘅系人性黑暗教育，好人坏人，首先都要学识点做人，电影话畀你知，识到坏朋友对人生的毁灭性可以有几大?戏中分“猴子”、“好人”及“坏人”三章，前段编排在情理之内又有心思，一开始已达到黑暗之极致，睇到咬牙切齿，佩服编剧九把刀之余，柯震东真系唔似第一次做导演，你以为只系一般校园青春片?错了。

因为玩大咗，以为走就冇事，后生仔即系后生仔。

戏中的警察亦不是好人。

衰格高中生闯大祸
三位高中生分别由蔡凡熙饰演王鸿全、朱轩洋饰演张博伟及宋柏纬饰演韩吉，三人完美演绎尔虞我诈及背叛，当中最乞人憎是张博伟，有佢讲冇人讲，钟意欺凌人又长期玩情绪勒索，呢啲人周围都有，当事人演到自己都觉得好讨厌，所以捧走金马奖最佳男配角。

韩吉走唔甩被黑社会施以恶刑，对两位老友心生怨恨。

戴立忍饰演兴哥，睇个名都知唔系善男信女，负责教三位高中生点做人。

电影前段写实又黑暗，剧情发展毫无冷场，虽然香港评定为三级，但血腥程度其实唔太高，亦冇打打杀杀到血肉横飞，反而心灵折磨先最令人坐立不安。角色动机有啲奇怪，但后生仔谂嘢估佢唔到，以为玩下啫点之玩出个十号风球程度嘅灾难，全片紧凑又有张力，仲有时间引你笑，配乐亦好出色，主题曲揾嚟落日飞车搭凤小岳共同创作，同电影夹到爆炸，香港上映一周但已冇乜戏院有得睇， 戥柯震东有啲唔抵。

韩吉好惨，被打之余仲要被兄弟情绪勒索。

三人玩大咗，最终玩出血，知惊但冇得补救了。

香港得好少戏院有得睇， 唉。

《星岛头条》新网站有更多精彩内容：http://www.stheadline.com/