【曾智华专栏】田鸡开餐

几十年投注赛马经验，“捐输”得多，当然或多或少有点观察、有点心得。事实部分Pattern，会不时重复又重复出现的。例如不时提及的方程式——高班让磅马少＝爆冷。
　　
此外，又有个情况，若一个马房一日之内大部分马，畀晒一位骑师策骑，乃出击信号。
　　
举例，上周日的苏伟贤马房出六只，有一只超班马“新力高升”，摆明实食冇黐牙，但冇乜水位，咁点呢？当然是苏厩自己部署过关。
　　
一睇，哗，其他五只全畀蔡明绍出策，等于必有王者兴啦。但我非局内人，鬼知去边只咩！一日未开赛，一日都唔知“肥仔贤”搞边科。
　　
点搞？一于全部十蚊鸡WP，睇睇佢开边瓣可也。结果个Pattern果然中，但势估唔到，佢搏的两只，一只是近十倍的“爵登”，尚算正路，只半冷。但另一只简直看台哗然，哗哗，咁都得？正是六十一倍的“佳尊三”！
　　
呢场吓到全场呆晒，因W出的“海豚星”老马七岁，二十九倍，搭落六十一倍的“佳尊三”，条Q派五千元过外！
　　
奇在两只马在闸前一路跌飞，毫无动静，恍似陪跑！结果开闸后你就知两位骑师希威森及蔡明绍的斗志。呢煲大茶饭，只得苏伟贤知道自己搏尽，就算食其全餐，喂⋯⋯今季都应赢够，可以收工喇。
　　
讲返今晚赛事，小弟直觉为“田鸡”开餐！其实观察佢每个赛日会否郁手玩“连珠爆发”，好易，睇第一、二场有冇抢钱咁款搏甩髀就知。
　　
今晚田泰安出足八场，马神帮到尽，因有七场抽到六档或以内，靓晒。另一只“赤马雄风”，也只七档，冇坏。
　　
睇个势，田鸡三只有机会，包括“英雄豪迈”、“红逸舍”及“闯一”。
　　
特别留意未跑过快活谷的“表之云端”，我嗦到有多少冷味呀！