独家丨40岁王嘉明被嘲一身肥肉:肥唔唱得歌? “光头仔”变单亲爸爸挑战《中年2》
“光头仔”王嘉明在84年经典港产片《最佳拍档之女皇密令》中跟麦嘉拍住上,当年的可爱童星话咁快40岁,阔别乐坛20年的他为延续歌星梦,决心挑战《中年好声音2》,唔介意被取笑肥肿难分。另外,回顾昔日童星生涯,他自爆当年拍咗3套戏已赚到几十万,80年代非常厉害,加上得到陈百强、张国荣及徐小凤等巨星爱锡,童年已大丰收。采访:方骞平

王嘉明在《中年2》海选中演绎张学友的《爱是永恒》,成功晋身100强。他在内地开直播唱歌时,被网民追问点解肥咗咁多?他秒回:“食咗20年饭,唔肥咪嘥咗?”对于网民将他跟小时候的“光头仔”比较,他啼笑皆非:“其实‘光头仔’都系我嚟,钟意佢,唔钟意𠵱家嘅我唔紧要,听吓我唱歌先。”从商多年,两子单亲爸爸王嘉明零包袱,勇敢反击:“唔一定要减肥先可以唱歌呀?唔系个个歌手都瘦到一碌竹啫,又唔系核突到令观众要转台,我冇谂过要做偶像,只系想唱出我嘅故事,希望得到共鸣。”



唱片部倒闭好难受
40岁的王嘉明仍然有歌星梦,他为了唱歌,未够18岁已卖身黄百鸣旗下的东方影业,由演员做起,至2002年公司成立唱片部,并为他推出EP《公告天下》,宣传期未完,唱片部因蚀钱折埋。当年他感到好委屈难以接受:“见同期歌手麦浚龙、余文乐、Cookies个个趁年底‘劈’奖(即争奖),明明自己势头好变乜都冇,我嬲到将Band房啲乐器捐晒出去,唔再玩音乐,仲同歌唱老师陈洁灵诉苦,老师鼓励我先转做其他嘢赚钱,‘到时仲有团火,返嚟唱歌冇人会阻到你!’呢句话我记到𠵱家。”





童星生涯有血有泪
王嘉明回顾做童星日子有血有泪,3岁时喺4楼“吊威吔”拍跳楼戏,虽然跌落去一刻系用公仔(远镜)及由柯受良7岁儿子做替身,但他仍吓到喊足一日,完全唔enjoy;直至拍到第3套戏,因为在片场吸得太多混浊空气,搞到肺炎要停拍,埋单计数连分红都赚咗几十万,“虽然冇乜读过幼稚园,但‘光头仔’好受欢迎俾红星围住玩,片场留有唔少难忘回忆,如张学友带过我睇佢演唱会;陈百强送紫色衫及最爱嘅加菲猫公仔畀我;我又去探过哥哥班,睇佢拍《英雄本色》;甚至喺新西兰拍《千里救差婆》见个靓景。”












当长大后重返影坛,王嘉明唔再被全世界围住嚟转,所以想唱歌做台上主角,他又爆当年麦浚龙在台上掟肖像公仔时,余文乐对台下fans说:“快啲执,钱嚟㗎!”作为生意人的王嘉明深明此乃市场推广策略,更笑说:“经历3年疫情,大家知道柴米油盐嘅重要性,𠵱家要拉票嘅话,我一定会掟粟米油及掟包米落台,相信一定会有人抢,掟唱片落台唔会有人吼。”










>>>星岛网WhatsApp爆料热线(416)6775679,爆料一经录用,薄酬致意。
>>>立即浏览【生活百答】栏目:新移民抵埗攻略,老华侨也未必知道的事,移民、工作、居住、食玩买、交通、报税、银行、福利、生育、教育。
