【曾智华专栏】夜缤纷快外判马会

近两年人人话香港言论自由空间大大收窄，系真唔系真，心照。不过，就算点窄，仍可以对不少事“说三道四”，尤其网上，对公家嘢毒舌如麻，串爆劲多，冷水盆盆照头淋，所以负责官员AQ低啲都好恶顶。
　　
例如搞到身水身汗的《香港夜缤纷》，上周四已算天公畀足面，晨早倒水咁倒，红雨警告，到傍晚立即收晒，畀机会你顺利开波。
　　
不过，坊间仍多唔卖帐，你一言，我一语，又话只“白狮”大吉利是，又话活动炒冷饭，了无特色，更弊为记者上周五晚再四围巡，已发觉不少夜缤纷区打回原形，好难谷得起。
　　
另外，更冇瘾是有比较就即刻相形见绌。例如《星岛日报》上周六A1，头条大大字报道《深圳抢攻21猛招吸港客北上/打造消费专区/大派优惠过夜有补贴》。
　　
喂喂，呢段并非广告，而系新闻！点解老编放佢在头版，仲鸡乸咁大只字报道？
　　
简单，市场导向，读者有兴趣也。
　　
点解深圳夜晚旺成咁？问的人若真想知道答案，简单，自己上去走一转，亲身感受吓就明白，一切绝非符碌偶然。
　　
香港又如何？我只见到一个地方真真正正有《夜缤纷》兴奋气氛，正是周三快活谷马场的啤酒园及现场演出的舞台前。中外人士笑逐颜开，揸杯啤酒又唱又跳又互“队”竞饮，马会搞呢个Happy Wednesday，成功到爆！
　　
特区政府唔好再自己嚟喇，官员血液里根本冇嘉年华DNA，监粗上马搞，一定四不像。咁啦，成个《夜缤纷》外判马会，肯定好快有料到！
　　
今晚快活谷又开波！有跑马、有音乐、有啤酒、有劲舞。小弟提供二班1650米贴士，“喜旺驹”上场热身开气，今场起筷，脚拖明星马“喜莲勇感”，沈厩镇仓宝！两档位皆差，换较佳赔率！