【曾智华专栏】残旧眼镜照偷

小弟凡开投资分享会，例必警告所有参加者，其中有句口头禅：“金融世界之内盗匪如毛，骗子如麻，全部以合法或非法姿态出现，目标只得一个：赚/呃你的钱！请勿儍到以为呢个世界有乜乜物物投资或金融顾问的存在，目标是真心想替你赚钱！”
　　
其实何止金融领域之内，严格讲，通街都有贼，问题系几时下手㓥你矣。
　　
这个情况，如今美国（尤其三藩市）、法国、意大利及南非，比比皆是，你身边朋友凡去过的，总有三几个中招，一系被偷，一系狼到被揿住抢。
　　
我又如何？自从几十年前买过一个劳力士（用来奖励自己升职）之后，开始放弃所有名牌，由头到脚只用街坊嘢，立即轻松晒，因唔见乜，都再冇肉痛之感。
　　
呢呢，前朝又中招喇，个贼都几猪头。
　　
话说我天天早上到高山剧场公园晨运，只穿汗衣短裤，不会带电话。拉筋时，除下帽及眼镜放在长凳，以免汗水弄湿。前朝又例行如此，先在健身仪器上玩二十分钟，然后到球场再快步行二十分钟。基本天天如是，不过，前朝“好彩”，行完之后，取帽及眼镜时，咦……点解只得顶帽，眼镜不翼而飞？有冇肉痛？冇，因朝早戴的只是廉价胶框旧眼镜，随时掉得，戴到残晒。而我的近视及散光，点会Fit到个贼仔吖？意即佢偷咗我副烂鬼眼镜，只有个旧框可用，相信攞去配镜片都畀职员笑啦：“先生，个框咁残，掉咗佢啦！三两百元有个韩国货。”
　　
兼且若佢真配眼镜，又再出现公园，喂，我一眼就会认出㖞，正猪头。 若果为避我而从此唔踏足公园，又何必呢？
　　
说来佢冇偷的帽才值钱，因属香港国际赛事（马）的绝版纪念帽，真系唔识货，懵炳！