【曾智华专栏】红山半岛做硬示范

众所周知香港遍布非法僭建，尤其村屋及独立屋，都几难揾到零僭建的“示范单位”。
　　
点解？因政府根本冇执法意志。例如早年林郑月娥想开工，逼丁屋僭建清拆，结果发觉抗拒力度之大，超乎想像，唯有冚旗，畀人笑都当听唔到。
　　
豪华独立屋又如何？更加明目张胆（大家如今见到红山半岛海边一堆，只是冰山一角！），尤其是掘地牢，外边见唔到，更加你又掘、我又掘，话知搞到地基如何危险！
　　
点解会咁？人性就是贪，加上在冇人知道、冇人理，甚至冇人执法情况下，当然静静鸡加大居所空间。你可知僭建多一呎，感觉上占咗几多便宜空间？
　　
兼且僭建有传染性，A业主见到B业主做，又冇后果，自己唔做咪好老衬？于是A又做，然后C、D、E、F、G个个都做，反正做，咁就做到最尽为止。
　　
政府系咪唔知？当然唔系。以为冇人知，你估政府儍的吗？但凡公务员做嘢，一定取易不取难。四万几幢大厦畀人“恰”，当然先做，唔做告上法庭，睇你点。
　　
但去到丁屋及独立屋僭建，立时执法意志弱晒，于是强调“边啲严重，边啲做先”，正待执法机遇（Law Enforcement Window）出现，这亦是公共行政的一项策略。
　　
好嘞，如今红山半岛山泥倾泻，灾难随时出现，正正露出一个千载难逢执法机遇。此时郁手，面对的是大群僭建的“次级富豪”，多数有头有面，唔敢挺身死撑，加上民意一面倒，故此，特首李家超以呢单Case树立权威，最为理想。
　　
一于下令所有僭建拆拆拆，然后再到西贡N间独立屋，再到……
　　
红山半岛做硬“执法示范”嘞。