【曾智华专栏】搞活呢样𠮶样

上一年政府兴讲“抢”，近月则兴讲“搞活”，搞活呢样，搞活𠮶样。即将开波的，正是搞活夜经济。睇睇网上留言，冷水多过热水，一盆盆照头淋。
　　
我又点睇？做好过唔做啦！政府跷埋手乜都唔搞就死硬，不如多多少少搞下，希望博三样中一样，都好过食“白果”。
　　
应如何搞活夜经济，喷口水者多，落手落脚者少。小弟听匀咁多意见，只觉得施永青比较近磅：“呢啲嘢，政府唔好插手搞喇，无为而治，政策上方便大家就得啦。商业活动交返畀商业集团度。有市场，有生意，佢哋自然爆出无限创意。相反，若冇市场、冇需求，猛咁打锣打鼓都只会拍乌蝇，失败收场。”
　　
其实任何大政策出台前，一定要做市场调查。最弊是为迎合一个“由上而下”的长官意志，就匆匆上马，齐齐交差。
　　
夜经济，搞活前，要先清楚点解现在晚上只有“谢经济”。把好脉，确定病因，然后设计“药方”，针对“病人”的需要。
　　
香港搞夜经济，首先唔关两组人事，包括六十岁以上长者及二十岁以下学生，前者根本冇精力夜蒲，后者翌日要返学，也不应夜蒲。
　　
咁最大市场喺边？正是二十五岁到五十岁，事业起步或在晋升一族。佢哋经济能力有、体能有，也需要多作或公或私的社交活动。
　　
若锁定客路是这群，就要彻底了解佢哋想要乜（饮、食、娱乐⋯⋯），点先可以令佢哋涌出来蒲。
　　
有咗调查结果，就可作针对性设计夜市策略，包括订立“晚晚蒲奖励计划”。而指定的蒲点，政府要松一松手，例如音量可以放宽啲，泊车唔阻街就免抄。然后再搞“最受欢迎夜经济”设计，直选投票，表扬各大商业集团⋯⋯总之，千祈唔好Hea搞！

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。