独家丨Tsoul玩《造星V》讲真心话被DM“问候”家人 冇吓亲照讲心底话：唔可以冇咗自己
《全民造星V》播毕近两个月，众囝囝仍然活跃，第五名的Tsoul(田曜诚)将于17日联同15名本地街舞精英出战殿堂级街舞大赛《Red Bull Dance Your Style》，胜出将代表香港到德国打大佬。决心做跳舞明星的Tsoul为人坦白，做访问乜都讲，钱银、女友、家庭、更首度公开澳门节目事件被围插后心情。问到深潜多时的Nathan近况，明显吓亲的他停顿6秒，脑筋快速急转，答到问题又唔怕得罪老友，论口才叻过好多《造星》师兄，入行冇问题啦。采访:廖思慧，杜杜 摄影:Stanley 场地:Boogie Renaissance Studio
街舞好神奇一跳爱上
Tsoul由中五开始跳街舞，一跳12年，“跟同学一齐跳，比人笑咗成年，话我跳舞样衰，当时考DSE，上堂成日郁身郁势（即场示范)，梗系比人笑傻仔。”至于点样接触跳舞？Tsoul讲到好好笑，“当时元朗有条街有一个Popping 嘅exhibition battle，一开始乜都跳，有少少呃钱Feel，个导师跟我跳两吓，就走咗去第二度，隔咗半个钟嚟望吓你，得啦，掂呀。”感觉濑咗人嘢的Tsoul再认识到Popping 老师，“叫Yellow，我第一个老师，好劲，本身觉得首歌好难听，但佢跳完之后我觉得首歌好好听，呢个系街舞神奇嘅地方，Dancer可以令你钟意首歌，好神奇，所以入咗坑。”至于学费？“好似300蚊四堂，用零用钱交学费。”
听到自己歌声好Kick
Tsoul仍不时翻睇《造星V》，最钟意决赛的两个Item，问到最唔想记起项目？他大笑兼笑唔停，“40强𠮶两个都唔想睇返，一听自己唱歌起晒鸡皮，决赛唱反而冇呢个感觉。”因为同Lokman对唱Rap更唱出乐趣，“原来唱歌系正㗎㖞。”60强的《和平之前》亦是最爱，因为大压力加上婆婆离世，坦言当时真喊，兼镜头后喊足45分钟的Tsoul对演戏亦有新感觉，“学识点样收放情绪，做惨情戏几有Feel。”偶像是星爷及郑中基的他觉得近年好少港产喜剧，想做跳舞明星之余亦想向喜剧演员迈进。问到会否去学戏？他答得坦白，“想呀，但唔够钱。”提他秋生开大师班，他苦笑，“好贵呀，Rosa(韦罗莎)都唔平呀。”
每日使费写落簿仔
之前Tsoul跟本报透露玩《造星V》使尽6位数积蓄，KC只是用了5万，问到条数点计？他即苦笑，“我系婆仔，乜都计晒落去，唔系Mark落手机，系写落簿仔，每日Mark低食饭几多钱。”因为全力投入玩比赛，Tsoul停晒所有揾钱Job，“就算冇收入都要畀家用，自己搬出嚟住要交租，KC都要交租，佢扮嘢啫，点止5、6万呀，比赛好多嘢要垫住先，好似我20强AI个死人箱都整咗4、5000蚊，大佬呀，容乜易10皮啫。”坦言教跳舞及做Dancer揾唔到食，因为唔稳定加上性格问题，好早已有储钱习惯，“Make Sure唔好使多过要储嘅钱，特别有返全职嘅时候，𠮶份粮用嚟生活，畀家用，找咭数，额外DJ，教跳舞班就全部储晒佢，而家啲钱全部用嚟生活，储唔到钱，更加要记住。”
Tsoul之前在网媒做Marketing Manager ，大小事务乜都要做，KOL Management 、Production 、接生意、跑数等，总之乜都关佢事。“17年到22年，有正职，放工跳舞，教班，周五六，教完班就打碟，六日有活动去打碟或玩比赛，维持四、五年，Marketing份工好Free，再之前好Reguler，冇自己时间，完全奉献畀跳舞。”
跳Popping揾唔到食
问到香港教跳舞揾唔揾到食？Tsoul九秒九回答，“揾唔到，睇你边个范畴，可以细分ＫＣ叫commercial ，我系Underground𠮶边，佢哋𠮶边好啲，因为有好多公开嘅排舞Job，MV呀，演唱会，Annual Dinner，我哋呢边真系斋跳，玩比赛都系得千零蚊奖金咋阴功。”，Tsoul有感而发，“比赛最多赢名气，冇乜钱，造星前，Popping堂都唔多人上，一嚟难，虽然好型，二嚟要时间，要跳到好似我咁型，（哈哈）讲笑啫，正常要成型都要二至三年，除非好努力。”20强时的AI项目，有个女仔同Tsoul一齐跳，“佢跳咗五，六年已经搞成咁，再跳多十年仲得了嘅。”
Tsoul再三强调教班人工只能当零用钱。“DJ又好揾过教班，去娱乐场所打碟，按小时计，可观嘅，一定多过教一堂，付出一至两个钟，但辛苦啲，夜晚打碟又要应酬，唔系打完就走，要建立人脉关系，同人饮吓嘢倾吓偈识吓人，当然之前疫情就GG。”再问同ＫＣ教班的学费会否有好大分别，Tsoul称大同小异，“佢哋易于吸人，一嚟几打人咁上，对啱啱学跳舞嘅人易啲上手，跟老师Step做，我哋要由浅入深，肌肉点样，条颈点郁，教Jazz Funk，Kpop就更加揾钱。”
父母只希望佢开心
因为用尽积蓄，Tsoul完比赛后努力教Popping及做DJ揾钱，以为有知名度后揾钱会易少少，原来唔系。“系多咗人上堂，以前顶尽10个人，而家每堂20几个。”由于打工关系，并非私人教授，学费都按返之前Studio收费所以并冇提高。首届《造星》，Tsoul刚从台湾毕业回港，对之后数届仅限于睇跳舞朋友的表演项目，至《造星IV》见到Gao的热血被冲击，上年辞去Marketing Manager工作全力冲跳舞兼参加《造星V》。虽然是家中独子，但家人并冇反对Tsoul以跳舞作职业，“父母只想我知道自己做紧乜，同埋开心，Settle最基本𠮶Part就唔会阻你跳舞，老窦同我讲，冇谂到我玩《造星V》玩到咁后，好零尊(笑)，佢好proud of我。”
接受唔到人生攻击
Tsoul同现任Dancer女友拍拖一年，“我冇收埋啲相㗎。”他笑言跟前任分开后决定唔再同跳舞人一齐，“好烦成日都见到，点知下一个都系，圈子好窄，讲真，活跃街舞比赛嘅，十年都系𠮶啲人，唔系A就B，可能A又同过B一齐，好多呢啲情况。”因为澳门节目事件，Tsoul社交平台被黑雨式围插，导致决赛夜观众投票急跌无缘入三甲，事隔两个月，Tsoul首次透露当时感受，“好记得即刻打畀安仔同陈蕾，‘搞咩呀？’好莫名，点解嘅？系我角度，我冇做错过任何嘢，好客观咁陈述返件事，剪接上冇呈现晒，咁呢个我控制唔到，我觉得，喂，我喺节目做咗咁多嘢，又冇做错乜，但你攻击我，仲要攻击埋人格，有啲会DM闹我屋企人，好难受。”问到会否怕咗入行？“又唔会，做呢行一定要识讲嘢，但唔可以冇咗自己，要讲心里面𠮶句嘢，你唔钟意都冇办法，我控制唔到其它人。”问到有无揾过深潜两个月的Nathan?一直轻松答问题的Tsoul吓一吓，停顿6秒冷静反问及回答，“会问呢啲㗎咩？有揾嘅，安全嘅。”
《星岛头条》新网站有更多精彩内容：http://www.stheadline.com/
>>>星岛网WhatsApp爆料热线(416)6775679，爆料一经录用，薄酬致意。
>>>立即浏览【生活百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。
