【曾智华专栏】高班让磅马少=爆冷

时间飞快，正！马季又开锣嘞，兴奋死！
　　
不过，睇见第一日的报名情况，真真唔多开胃，班练马师究竟想点啊？一千二百几只马，唞暑两个月，咁都唔畀面，只懒懒闲入纸，作为新季第一炮，你班友真系制造“反高潮”。
　　
尤其那场“特首杯”，只得六匹马报名？成何体统？唔该特首阿超哥揾利子厚主席倾倾，咁情况唔搞好过搞，小猫三四只，你系特首都唔会有兴趣入场颁奖啦？不如下届取消咗佢！
　　
不过， 虽然特首杯如此冷落，但并未减小弟研究兴趣，尤其呢场跑九十分以上高班马。
　　
个人多年观察兼用真金白银换回来的亲身体验，有句口号十次中八次，正是：高班、让磅、马少＝爆冷！大家有兴趣可以翻查纪录。
　　
今次文家良在如此赛事出只马王“金钻贵人”，实在令人费解。阴谋论者必问：“喂，好等钱使咩？定系摆明搞局呀？”
　　
事实“金钻贵人”131分，与“金鎗六十”同分，马王中的马王，为乜要让磅跑只“奀杯”？完全唔合逻辑！
　　
须知每一场赛事，都唔排除有意外情况发生，为乜要在呢种场合冒险？值吗？
　　
再者，每只马都有里程（竞赛生命），“金钻贵人”已五岁，跑过十七场，即里程用咗六六七七，为乜唔留返平磅高奖金大赛出击？
　　
如今走出嚟跑场“唔三唔四”杯赛，我睇颇有“请君入瓮”格局， 随随便便跑，当热身。难怪阴谋大师纷指：“幕后输马会赢大钱㗎！”
　　
系真唔系真？明天就揭晓。不过，我当然冇兴趣买“金钻贵人”W，反之买佢仆！
　　
呢场其实得四只马跑——“金钻贵人”、“维港智能”、“骏马风采”及“顺势而飞”。可四只买二重彩复式，再加“维港智能”做二重彩复式胆，应有得执！

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。