【曾智华专栏】最好手势抽血员

我每年最少要抽两次血，这是QE心脏科覆诊前的指定动作，搞清身体各部分有冇要解决的问题。若要额外抽血，则因突发病睇私家医生时，被要求验血。
　　
多年来对抽血已累积相当多经验。事实上，我的左手血管，有个长年抽血留下的明显针孔疤痕，若抽血员视力正常，必定看到，甚少要笃完又笃去揾血管。
　　
讲起笃完又笃，最恐怖一次为多年前在QE留医。清晨七点左右，实习医生来抽血。大镬，遇上个极度新手，可能挨完通宵冇精神，加上欠缺经验，揾来揾去都揾唔到血管，于是随意插下。哗！人嚟㗎，有神经线㗎！不过，见佢咁腾鸡，无谓怪责，只轻轻一句：“拮错呀，医生！”
　　
拮错？抽返支针出嚟，再揾囉。再拮，哎吔吔，又唔中！如是者，第三针才入到血管，但已经痛到黐肺，几乎眼泪都标。
　　
抽血，遇到一个年长的抽血员就可以心安，因佢日抽百筒，真系合埋眼都知血管位置何在。
　　
所以，每次到QE排队抽血，我都心中唸唸有词：“中个大嘅，中个大嘅⋯⋯”
　　
因病人冇得拣，十几个抽血员，只得三五个“大仙级”，一撞正新手，咁就准备——哎呀好痛！
　　
讲到抽血，小弟经常可以试到完全无痛抽血，犀利到抽完都未知，因冇感觉！呢类“神级抽血员”的手势，若医院内抽血员个个如此，病人发达！
　　
边个咁劲揪？正是每日公园晨运之际，替我“抽血”的蚊！真真冇得顶，落针丁点冇感觉。若非畀我睇到，兜嘢拍死，就真系抽完都未知，直至发痒！点解蚊抽血可以冇感觉呢？要昆虫专家解释嘞。但愿医管局安排抽血员多多向蚊滋学习！