【曾智华专栏】初恋一于睇《酿魂》

近日凡见任何成熟老友，例推介一定要睇《从前的我们》。点解只是成熟人？因剧内的感情及韵味，年轻人难有深刻体验及共鸣感。
　　
好嘞，若果你初恋，又或第一次约女仔睇电影，我又有好介绍，一于睇《酿魂》啦，保证睇完有意想不到的效果。
　　
约女仔去街，若果真有Feel想发展的，男方一定扮斯文有礼，唔会飞擒大咬，以免留下坏印象。
　　
其实女仔肯单独应约，已经成功咗一半，若能去到拖手仔阶段，就更加冇乜得输矣。
　　
问题在拖手也不能话拖就拖，必须要有个酝酿过程。例如过马路，为护花、为安全，轻轻拖一拖，不会尴尬。就咁，若过完马路女方冇Signal放开，即系……掂咗！
　　
另一种场景为约睇戏。排排坐在漆黑影院中，最易有发展。但睇乜戏极重要！首选当然是年轻美男美女爱情片，最易有代入感也。
　　
次选则是恐怖片。要不停吓餐死的，令女伴全程好惊，需人保护。呢呢，上周开画的《酿魂》，就正有这种“功能”嘞。
　　
但咁，今个世代有不少细胆男，毫无大丈夫气概，若自己惊到濑尿，要倒转由女方保护，咁就散梗嘞。
　　
《酿魂》发生在荒岛上，几个年轻人撞入鬼屋，遇上连串诡秘事件及怪异力量。
　　
新进导演岑嘉彦分别在澳洲、上海及美国接受戏剧及导演训练，也参加过不少荷里活制作，相当有天分，电影技巧纯熟，每场戏明显花上大量心思细度，不似部分港产片般“搻簁”。
　　
戏内姜大卫外，全皆年轻演员，个个落力演出，但演技稚嫩，故当“老姜”大卫一出场，立时全比下去，正常。
　　
其实姜大卫初出道时，一样木口木面唔识演戏，但日月自会炼出精华。