【曾智华专栏】防“佣”之心不可无

香港有几十万外佣，主要是菲佣及印佣。咁多人，当然乜品格都有。好的当然有，坏的肯定也不少。尤其从乡下地方来的，到咗一个“花花世界”，引诱极多，稍欠定力，“奸的同乡”一定会教坏佢。这个，有三几十年雇主经验者，必定经历过，甚至“交学费”也不会少。
　　
单讲小弟，几十年前初请菲佣，真系一嚿云咁，唔知佢哋有乜劣质文化，后来当然“开窍”啦。首先，敌不过“贪”。穷乡僻壤来，入到一个满是“宝”的家，若主人乜都随处乱放的话，睇得多就会心动。起初静静鸡攞一件收埋，若未被发觉，胆就随之而大，跟着二三四五件逐一偷也。
　　
朋友之中，闭门失窃个案不少，最新一宗，主角激到几乎晕低。
　　
“碌Sir，唉⋯⋯一日都系乱信人。基于求方便，我iPad个密码通知咗菲佣，方便佢替我处理日常事务，点知⋯⋯”L姐呻到树叶都落。
　　
L姐记忆力麻麻，为免自己大懵，故几乎所有要用密码的，都用同一组数字。哈，咁就死！佢连夹万都系𠮶组密码。如此这般，菲佣就趁佢出街时，逐次逐次少少咁偷。起初L姐完全唔觉，直至一次去饮宴，想攞只镶好的钻戒用时，咦，乜冇咗？然后才醒起，近日从银行提取放夹万的现金“好快用完”，先至察觉唔妥！
　　
佢点搞？唔讲啦，总之几乎断气。
　　
“碌Sir，其实我晨早应该炒咗佢，哎，一日都系自己心软！结果⋯⋯”
　　
L姐原来早早察觉，菲佣经常晚饭洗完碗，就返房锁门话瞓觉。原来⋯⋯佢不时从后门窜咗出去，唔知搞乜（当然可能有兼职啦！），直至天光前才静鸡鸡返归。
　　
L姐点知？因终于有位通宵更保安忍唔住，爆出这个“天大秘密”囉。