【曾智华专栏】街外钱，大家揾

你可知我每日花几钱买《星岛日报》？报面印10元，而我付的是7元。
　　
点解？正因朝早在土瓜湾靠背垄道便利店买，减1元。再者，嘻嘻，唔知有几多人识，网上有“星岛日报零售版购报优惠卡”，一嘟再减2元！
　　
卡唔使钱，人人可下载！但唔再教你喇，自己揾啦，做人一定要戒“饭来张口”懒惰习惯㗎！不过，既然街外钱，我就爆畀你知啫，悭得就悭嘛。
　　
讲到街外钱，上周本栏大字标题：《跟杰华海外赛提供》。
　　
究竟你有冇睇，又有冇跟呢？若有，已经发咗个小财㖞。因见报之后，若似小弟般，每场买10元复式二重彩，咁上周四及周日两天的英国、法国赛马，就有2,194元利润啦！
　　
十个马评人，十个喜欢认叻！故此，希望只只畀，只只中（边有可能呀？）。中的，理所当然大锣大鼓，拍枱拍櫈；衰咗，当冇讲过，冇事发生（以上请勿对号入座，我讲自己咋）。
　　
不过，也有成日中又从不提一声的，例如在本报提供海外贴士的杰华。
　　
海外赛事，老老实实嘞，十个马评人，九个识碌竹咩，包括小弟，扮都嘥气。我曾用“博览群家”方法，长期统计各大报章及网页提供的贴士，发觉杰华水准非常稳定。不用讲太远，大家翻查最近四次英国及法国海外赛，已知佢几犀利，次次中两场至几场，有的中埋三重彩。
　　
我每场跟买10元复式二重彩，就咁过去三日赢近3,000元！例如上周四，第一场已中，派1,204元，第四场又中。
　　
上周日同样厉害，第四场出冷，派1,567元，吓死，三重彩若有买，又中，派14,077元！点解冇人识的海外赛，佢识？一嚿云！