【曾智华专栏】写好佢Vs.写死佢

凡做过政府部门管理层者，见到上周公务员事务局的一项公布，相信必会想起上世纪80年代谭咏麟名曲《迟来的春天》，因实在等得太久太久了。
　　
绝非讲笑，任何部门的中上层皆知，在政府之内，想“炒”一个公务员难过登天！（有不少话：“炒自己好过！”）
　　
公务员只要过咗试用期，就恍如有个金刚罩。以后无论蛇王吞卜、怠工抗命、人缘狂差、诈病蛊惑⋯⋯任何在私人机构可以即炒的过失，全不能应用到公务员身上，除非犯下刑法。
　　
人有好多种，少数正正满身阴湿计谋细胞，当知道过咗试用期即冇人可以郁佢时，会立刻“魔鬼员工”上身，懒得就懒，蛇得就蛇，因明知上司吹佢唔胀。
　　
乜唔系每年有考勤报告嘅咩？系！不过，考勤报告有得抗议。只要一个员工认为上司对佢不公，可以向独立委员会上诉。
　　
如此，上司立即烦到抽筋，因最少要写几十个Report，证明自己冇徇私、冇针对，完全是对方未能履行基本员工责任。要点搞？要长期详尽记录懒散员工有何犯错，曾经点样帮佢改善，真系人都癫。管理人自己已孭N咁多责任，若旗下有一个“玩嘢公务员”，真真头晕身㷫。若多过一个，简直想撼头埋墙死咗佢。
　　
点搞？有计！人老精，鬼老灵，既然踢唔走啲“玩嘢”者，咁粮又唔系自己出，一于倒转玩，在人事报告中写到佢出色到天上有、地下无，理应立即升职，调到其他组别及部门。
　　
唔好呻荒谬，亦唔好问系咪搞笑。总之，有三十几年资历的公务员，无不亲身目睹这种戆居情况。冇人想咁，但制度促成咁！
　　
简化踢走劣质公务员程序，真的是“迟来的春天”。