【曾智华专栏】根本唔够马分

1999年在香港开仓的南非练马师苗礼德，最近两季成绩大跌，刚季更加包尾，只得九场头马，令马迷大惑不解。因此君在过去二十四个马季，曾两度夺得难度极高的打吡大赛冠军（“胜利名驹”及“雄心威龙”），而“雄心威龙”更两度成为香港马王，老苗练马功力毋庸置疑。点解会突然“搞成咁”，至今仍是一个难解的疑团。
　　
事实马会并冇炒佢，今季其实照样发牌，而圈内皆知，老苗本想练下去，希望证明自己的价值。不过⋯⋯ 众所周知，马圈乃最讲现实的英雄地。你练到包尾，又收咁贵，当然被揶揄“烧鹅价钱练出蔗渣味道”啦。如此环境，将心比己，你是马主，会否仍每月付出高昂费用畀马佢练而极大可能得个桔？当然个个心谂：“点解我只马唔畀新开仓的过江龙廖康铭或本地姜巫伟杰试试呢？两人新嚟新猪肉，为交出成绩，必定搏老命也。”
　　
其实苗礼德并非想拜拜，而系形势所逼，想练而冇马练，仲有得唔走？
　　
香港现役马约千一匹，每日皆可能有三、四匹马因这样那样情况退役，即长期只得一千匹松啲，而要分给二十二个马房。
　　
马主心态，当然信名牌，西瓜靠大边！于是乎头十个仓几乎个个爆棚，即已垄断接近七百匹现役马。咁即系点？简单数字，余下十二个仓，就只得三百几匹马分，平均每厩三十匹左右。
　　
在此情况下，就算苗礼德勉强留低，你话惨况会点？分分钟只得二十匹以下，真系“跑鬼跑马”咩，肯定又再包尾啦！
　　
顺带一提，来季马主更难做，整体经济不佳情况下，通胀仍不停升，马会当然“糖又加，盐又加”，想学人做马主？唔该照镜谂清楚！