【曾智华专栏】高章印度情欲片

由美国到香港再到全球，本周最多人讨论的两套大片，当然为《奥本海默》及《Barbie芭比》，前一套极品之作，小弟上周瞓身推荐，并预期能于下届奥斯卡大放异彩，“十拿七稳”（即十个奖项攞硬七个，其他三个则边缘）。
　　
专栏刊出两日后，不少老友来短信：“喂，碌Sir，为乜唔写埋《芭比》呀，美国收赢《奥本》㖞！”
　　
唉⋯⋯真系难于启齿。可能系我冇文化，可能系我欣赏力差，可能系我不懂美国人口味⋯⋯总之，入场睇《芭比》，十五分钟已经瞓着！醒醒瞓瞓四次之后，终于决定离院，刚刚是一小时十分。
　　
咁睇电影，点写“影评”？写咗都“呃稿费”啦。唔好意思，请大家“另睇高明”可也。
　　
返到屋企，条气唔顺，又有时间，又想睇电影，点搞？易啦，一于揿到Netflix，睇睇7月有乜新片上架可也。
　　
咦⋯⋯有套几吸引㖞，印度片，名《爱欲四重奏2》（《Last Stories II》），乜印度会有情欲片嘅咩？边个做？尺度如何？小弟大为好奇，立即先睇介绍！
　　
原来此片大有来头，第一集2018年推出，立即轰动一时，并一举摘下艾美奖。剧本意念来自2013年，同是脍炙人口的《孟买之音》（《Bombay Talkies》）。
　　
两集《爱欲》皆分别由四位导演执导，每人拍一个故事，以爱情、色欲，以及各种男女性关系贯穿，意识相当具突破性，也大胆。不过，基于印度电检尺度，并冇彻底裸露镜头，全部适可而止，留下大量想像空间畀观众。
　　
一部戏分四个故事的好处，为四个导演（R．巴尔奇、康柯纳．森．沙尔玛、苏卓．枸许、阿米特．拉文德纳特．夏玛）皆唔衰得，同时摆上擂台比并也。
　　
睇《爱欲四重奏2》，完全冇睇《芭比》般的睡意，一百三十二分钟飞快过去，因为属相当高章作品也。