【曾智华专栏】上错贼船点办？

个人社交平台不少留言都是问投资的，但问者十之七八皆属“无知”，投资而“无知”，唔死几难矣。

大量打工仔，死挨烂挨才储到两、三百万元。另外，不少人买𩠌为悭三几蚊，也会身水身汗四围格价，仲有啲打风落雨、酷热天气也不搭的士，而走去轮巴士，就为少付三几十蚊。

但以上的“精明人士”，一去到“投资领域”，立即变白痴。个个连家公司做乜业务、有乜前景、管理层如何、负债比率如何⋯⋯乜都唔知，只见到网上“有人话”呢只“当炒”，就瞓三几十万元，甚至一两百万元落去。

咁冇脑，你叫我点帮你呢？

但人的弱点，就是又贪又懒（学习），再多两样就是好色及孤独，四味加埋，简直是任何骗徒的肥大水鱼，唔㓥你就真系“冇天理”（骗子心态！）嘞。

无知有好多种，但若果你又唔睇新闻，又唔日日夜夜留意行骗最新手法，咁中招乃迟早的事，十种电骗，你起码中几种！

昨日有位长者粉丝喊咁口留言问：“我早前在网上见到乜叔及物Sir指有只股当炒，号码系24XX，我虽然唔知只嘢做乜，但乜叔及物Sir咁大名气，咪跟囉。初初买一手，好快赚咗五成，再买又再中，于是将银行定期百五万蚊放晒落去，点知⋯⋯竟然一日跌一半，揸多啲又跌一半。几蚊入，如今变四毫子，碌Sir，我应该点搞呀？”

一听佢话网上的乜叔及物Sir，已知假嘢啦。两个我都识，点会推介呢类“老千股”啊！其实以前班骗徒也曾冒认超人及薯片叔叔引水鱼，不过佢哋太猛料，冇乜人信，于是改揾返班财经分析员做“招牌”行骗。十个无知友中一个已好和味！

我点答？简单：“上错贼船，速速跳船！”