【曾智华专栏】超级抵睇，难言惊喜

电影的宣传片是两刃刀，可以吸引你入场，也可令你入场之后，觉得反高潮，超高难度的动作片，例如《杀神》系列及《狂野时速》系列一类大片，通常上画前一个月已在戏院、电视及网上大力狂谷，将最精华惊险片段剪出，日播夜播。
　　
系呀，可以制造万众期待效果。不过，真正睇时，大家可能冇晒瘾，因最正的片段已睇过晒。
　　
今次以雷霆万钧姿态，铺天盖地宣传的《职业特工队：死亡清算上集》，也绝对如是。
　　
个多月前开始，任何电影画头必有此片精华片段，吸引到飞起，但见“靓佬汤”幕幕揾命博，狂飞车不止，更“飞人”，由千米高空往下冲（用替身啩？）！打斗设计也难度绝高，睇见都有啲鼻哥窿冇肉之感（佢强调绝少用CG，大部分坚持嚟真，唔用替身！）。
　　
咁鬼吸引，小弟当然第一时间仆入场，睇睇原汁原味的又如何？
　　
第一感觉，太长，两小时四十三分，根本应该剪去三分一，尤其揾戏做的多余文场；第二，剧本套路毫无新鲜感，二流编剧都可创作出来，故全片只能以大量难度高动作补救；第三，所有最精采的片段已在宣传片中睇过晒，人人睇咗N次，已再无惊喜。
　　
你问我此片抵唔抵睇？抵到出汁！畀一百几十元（我是七十元长者票），有咁高水平的天文数字投资电影你欣赏，仲想点？
　　
但有冇意外惊喜？零！基于银幕上画面熟口熟面，故银幕下的我可以出出入入去洗手及覆电邮。每次离开再返座位，完全冇“断片”，一切发展在意料中，一于继续睇。
　　
汤告鲁斯就似几年前的成龙，每见佢坚持死搏时，真想问——几时考虑收手呢？