【曾智华专栏】你的毒药，我的蜜糖

童年时已接触以下两句：一、你的毒药，我的蜜糖；二、你的地狱，我的天堂。
　　
老师不用多解释，因小学生也能意会，然后开窍，推而广之，就会知道每一件事都可以从多个角度去感受。此外，不同人对不同事的喜好，绝不会一致，视乎个性、兴趣、利益与立场。
　　
正因咁，当我听到近日马经界老友呻到树叶都落，话7月开始，赛马进入“地狱赛程”，辛苦到呕，马会绝不应作出如此安排，我几大唔讲出心中话，只一律以微笑回应。
　　
事实，佢哋系咪好辛苦？系！系咪踢晒脚、头都大？系！马评人是否根本冇时间逐场研究，唯有符符碌碌交行货贴士？可能系！
　
不过，老友，每个行业都有其游戏规则，你加入时，理应清楚。再不，既然是一份工作，一份责任，呻又要做，“享受”又要做，若日日夜夜咿咿哦哦，实在令周围人有点烦厌，反应必是：“咁鬼难，你就咪鬼做啦！”
　　
睇睇英超，圣诞前例必开快车，两日一场等闲事，做球员的早知，正是食得咸鱼抵得渴。
　　
赛马圈又如何？你话香港九日跑四次赛马辛鬼苦？哎吔吔，你千祈咪畀英国佬听到，因为佢哋刚结束的“皇家雅士谷赛期”，五日跑五次，同一个马场，同一班马评人，同一班工作人员，更重要，同一班骑师，兼且不少场次成三十匹马！
　　
你香港九日跑四次，你好意思话系“地狱赛程”？真系笑死英国佬未天光！
　　
马经界老友知否，呢四日马迷系几开心的呢？跑呀跑呀跑，好快乐㗎！是否正是你的地狱、我的天堂最佳写照呢？
　　
今日研究第六场，十二只中，告、蔡两厩共五只，随时一齐缩！买“你知我拼”及“八心八箭”对碰W！