【曾智华专栏】你的最爱是谁？

踏入季尾，大赛跑得八八九九，全部高潮已过，咁仲有乜盛事呢？有！正是选最受欢迎骑师及最受欢迎马匹。全面开放畀公众投票，直至7月7日截止，一人一票，一定公平（啩？）！
　　
先讲骑师，今季冠军，冇咗“拉叔”之后，完全冇得争，潘顿大超班（其实亦因好马都畀佢霸晒），远远抛离第二位的何泽尧。不过，你知我知，潘顿以“软硬鞭”见称，龙或虫任佢开，玩死马迷，故此，如小弟一类，选最受欢迎——绝对唔投佢，因唔服！
　　
至于第二位的何泽尧，骑功未算顶级，表现也不算最稳定，若冇咗“金鎗六十”，也好难有光芒之感，呢票我也投唔落手。
　　
至于经常入到第四的“田鸡”田泰安，也只是一班尾货色，经常在一日之内“一系唔去，一系狂去”，水准太飘忽。
　　
睇来睇去，小弟一票决定投畀42岁的老将布文。呢位四届雪梨冠军骑师兼澳洲赛马名人堂获选者（2019年），愿意长期留港，实乃马迷的最大福气。
　　
布文跑咗半季，已稳坐三哥之位，功力绝对货真价实，忽龙忽虫表现甚少，马迷有目共睹！此外，老布与各大马房合作也相当犀利，能全部出赛马匹皆入前四名的包括：文家良、方嘉柏、吕健威、沈集成、告东尼、姚本辉、徐雨石、贺贤、叶楚航、蔡约翰、郑俊伟及罗富全。难怪个个练马师锡晒佢，争住合作！
　　
至于最受欢迎马匹，冇得争，一定系“金鎗六十”，今季出五次中至长途，四W一Q，难度远比只懂跑短途的“金钻贵人”高得多，人人都写个服字！
　　
今晚快活谷之战，报名罕见踊跃，只有三班大长途较疏落。决定“包装旋风”、“高瞻远瞩”及“劲驹”三匹二重彩复式互穿！

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。