【曾智华专栏】写极唔“断气”

早前小弟在本栏介绍一位唱极唔“断气”的歌手，名Solo，70几岁，逢周五在湾仔一家社企“New Life生生餐厅”六点开唱，直踩落十点，完全唔使休息，冇Break，更神奇，不用去洗手间！简直“奇技大观”。
　　
此君另一神级功力，整晚完全不用睇谱、睇歌词，就可唱出上世纪由50年代开始的经典名曲，国语又得，广东话又得，英文更是耍家。
　　
文章刊出后，N咁多人订位去“参观”呢位全世界独一无二奇技歌手，搞到餐厅主理人Tina大乐，因为帮到好多弱势社群人士有工开也。
　　
我形容人“唔断气”，但也畀人同样形容。
　　
社交场合中，被人问得最多，当然为近来买乜好？（点解香港人日日都挂住投资的呢？唔投资会瞓唔着？）
　　
另外有不少人又问：“碌Sir，点解你日日咁多嘢写，可以写足几十年仍未‘断气’的呢？究竟有乜条件先能做到此境界？”
　　
其实不同人有不同天分，若顺住去做，多数会有成效。
　　
写稿，有人攞起支笔觉得成担重，呕一篇文章，惨过便秘者如厕（唔好意思，比较核突，但这形容最贴切）。
　　
我呢？因天生对所有事物好奇，又对乜都有看法（冇话啱唔啱），又有发表欲，更甚唔知面懵为何物，故可以执起笔就写，间中快如闪电。
　　
点解面懵为主要条件之一？心理学有授，老一辈长者亦不时讲：第一，事事沉默，畀人一种智者感觉，尤其不少男性会如此扮嘢；第二，正是“唔出声冇人话你哑”！讲少啲，写少啲，唔发表意见，最安全，明哲保身也。
　　
但是世事两面睇，若个个唔出声扮智者，唔讲嘢求安全，咁社会仲点会“五光十色”及“百花齐放”呀？好啦，你唔写？我一于写到“唔断气”囉。