【曾智华专栏】ABC勿沟落一二三

你抢别人人才，别人也抢你人才！昨日讲到有外地富豪，为搞个大到惊人、足以同时开二千席中菜的会议展览中心，而当地根本冇人可以承担管理厨房的大任，于是来香港挖角，一出手就令目标人物无法抗拒——六倍薪金加豪华住宿及座驾，另头等来回机票、班底任请⋯⋯

外边不停挖香港饮食业人才，其实香港自己业内也互挖。厨师之外，管理人才更吃香。

小弟与辉哥三十多年前认识一位业内女强人，名郭雅诗（Alice），打得挨得管得，故大受当年鸿星集团老板器重。郭小姐天生豪气，极易与大开大埋的传媒人做朋友。例如N年前已与广播界前辈陈任深交，对方不时传授待人处事及公关伎俩，间接令Alice火速上位。

一上位，自然多人撬，但郭小姐属义气仔女，既得老板提拔，岂可别人用钱挖就跳槽？

直至鸿星集团转大股东，时机到了，郭雅诗三年后终可向外闯。

今天佢乃一个庞大饮食集团高层，负责管理几万方呎大的“星荟馆”。

前晚又与辉哥一同叙旧。Alice两杯到肚，不忘再谢上咗天堂的恩师陈任：“佢真系教我好多嘢，尤其宴请不同业界人士。初出道时，小妹蒙查查，以为凡同一界别者就可共坐，点知⋯⋯哎吔吔，原来个个江湖有恩怨，中间冇人话你知边个与边个有牙齿印，你唔识做，将ABC沟落一二三，即刻死得，嬲你唔知，话你唔好意思！”

对，宴客，排位大过天！呢项“艺术”非常重要，必须事先摸清边个同边个妥/唔妥！“星荟馆”内古玩甚多，好此道者，唔食都睇吓！