【曾智华专栏】星洲先行，澳门下个？

香港“永远”继续马照跑，但新加坡已正式公布，拥有一百八十年历史的赛马运动，唔玩喇。跑埋明年10月5日最后一日，就将马场交还政府。
　　
可唔可惜？等当地人话啦！
　　
睇走势，根本当地赛马一直在阴干，由十多年前过万人入场，到去年得返六千。
　　
近日更愈搞愈缩，平均二千六百人，相比沙田大赛时的万人空巷，蚊髀同牛髀矣。
　　
事实，新加坡赛马在级制赛水平来说，根本得啖笑。二十三个骑师名字，冇个有国际知名度。意即欧洲、美国、南非、巴西、澳纽等地的二三线人马，都冇兴趣去比赛。
　　
新加坡地皮一如香港，根本是黄金，若未能对国家产生贡献，呢一百二十公顷地，就应另谋发展，变成公屋及豪宅（可建二万至四万间）、科技城、运动城⋯⋯对当地GDP贡献，肯定大得多！
　　
新加坡唔玩，香港能否执到多少“笋货”？冇乜咯。以前佢哋有莫雷拉及爱伦，今天只得一个桔。七百匹战马，怕且香港马主及练马师都唔会有兴趣接收，只得澳门可能有兴趣。
　　
讲到澳门，当地赛马业其实比新加坡更“当揼”，完全不成气候（因被香港马会逼埋墙角），冇得在香港播，香港人不准投注外地马，即系点？即系马会加政府携手阴干澳门马。
　　
如今开一日蚀一日，个场有点甩皮甩骨，骑师及马皆不成气候，都唔知跑落去为乜。
　　
新加坡既然当机立断，先行唔玩，澳门都唔慌会远嘞。事实，氹仔个场咁靓咁大，位置又好，起乜都好过再跑（马）落去啦。
　　
今日研究第二场一千米，牌面“美丽缘分”热爆。大家必须留意上次“软硬鞭”胡浑的“善财童子”，徒弟孭飞，师傅去马，谁曰不宜？