【曾智华专栏】贪“蛤乸”者必中招

有几个自称叻仔的朋友，最喜欢与骗徒“玩”，因佢哋认为骗徒成功骗人前，必定先大放甜头派福利，因只有如此，才能引到大量水鱼上钓。
　　
例如庞氏骗局，第一、第二、第三群入局者，都会赚到盘满钵满，深信真系“好易中好易买餐𩠌”，才会将经验四出宣扬，游说亲朋戚友快啲参加“发达游戏”。
　　
叻仔们认为，只要赚头一、二、三轮就退出，咁就变长赚，留返班水鱼去送死。
　　
系唔系呢？难讲，但起码小弟从未见过这种叻仔“住上半山区”，做咗管理高层，甚或丰衣足食，多只是继续吹嘘自己可以征服骗徒。
　　
香港骗徒之多，如天上繁星。不少手法真系老到牙都甩，仍大把水鱼上当，乃因两个永恒的原因：贪婪、无知。
　　
最近通关后，又出现大量免费旅行团。有啲𠱁你去星马泰菲等地参观Time Sharing别墅或酒店，声称放下一笔订金，就每年可“免费度假”。
　　
另外，唉⋯⋯内地楼市跌到一仆一碌，咁点呢？当然要打锣揾“香港水鱼”上去帮手扫货啦。
　　
骗徒深知道不少港人对买楼有高度兴趣，甚至心急如焚。刚刚遇上内地大量烂尾、空置、断供⋯⋯甚至“鬼域楼”，急需人接货。
　　
咁点搞？最紧要你贪！
　　
故此，近日不少免费包食包住包车睇楼团，频频拉客。总之，唔怕你精，唔怕你呆，最怕你（唔贪心）唔来。
　　
反正内地各式冧档单位（商业、工业、住宅⋯⋯）多如天上繁星，几十万元到几百万元任你执（当然执条袜带累身家啦），只要你肯入“笼”（困在售楼处），班训练有素的经纪，自然会搞到你走唔甩，最少五个有一个中招（买咗间唔知乜物业）。
　　
我都好想介绍几个叻仔朋友去“大显身手”。