【曾智华专栏】老男人佳音

从来冇谂过，男人去到咁老仲可以咁劲！

记得童年时望着父亲及一众叔伯，觉得男人40几已纷纷露出老态，岁月无情，残晒。故此，55岁退休合理，60左右已纷纷拜拜去也。

但发展到今天？唔系嘛，乜个个食咗仙丹乎？最大“笑料”当然为脚震震懵闭闭成日PK的拜登，竟80高龄做美国总统，更雄心勃勃争取连任！

而佢对手特朗普都唔细，70有6，仍日日想卷土重来，权力欲及权力火，半点也没减退。

更神奇，原来老男人的性能力可以好劲！劲到匪夷所思！说来，近十年小弟身边同龄之辈，已纷纷前列腺发大，又或性欲日渐“力不从心”，谂住个个都系咁上下啩？

原来唔系！你睇钢琴家刘诗昆，83岁得女，问你服未呢吓？

荷里活的老男人产子更热闹，先有79岁金象影帝罗拔迪尼路宣布再为人父。跟住一个更劲，83岁的阿尔柏仙奴，也一击（唔知系咪㗎）即中，做得佢个孙咁年纪（29岁）嘅女友Noor Alfallah宣布怀孕。

最过瘾，荷里活巨星的女友及老婆，好似“踢波”咁，一时你交畀我，一时我大脚全中畀你。

例如呢位Noor妹妹，咁细年纪，已经可以短期同几个名人有一手，当中包括90几岁的巨星奇连伊士活及70几岁的米积加。你话啦，以我哋少少保守的华人睇，系咪有多少O嘴呢？

最近香港有位移民的大教授，虽则80几岁，但早年丧妻，独身一段日子后，如今身边又有咗红颜知己喇。

大教授散布全球的弟子，不少已70多岁，见到老师咁有艳福，笑不拢嘴问：“咦，佢会否又变‘阿尔柏仙奴’呢？哈哈哈！”

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。