独家丨伍咏薇首任《造星V》评判揭跟陈咏燊互睥原因 把关严谨获赞:入复活区都系死狠心啲啦

伍咏薇(伍姑娘)于08年在《香港先生》比赛中“品仔”品到要戴氧气罩一幕成为佳话，所以新一代观众得知伍姑娘任《全民造星V》非常重要的首Round评判都好担心。节目播出两周(截至周一晚尚余27个名额)，伍姑娘的评审表现中肯又称职，参赛者以为向她派心放电就可以顺利获蓝灯，点知伍评审完全唔Buy，专业表现令观众相当惊喜。对于陈咏燊的“一灯大师”角色设定，伍姑娘仲有料爆𠻹。另外，之前未睇过任何一季《造星》的伍姑娘坦言首做评审好有使命感：“唔系玩，唔可以乱咁畀分，要发掘可造之材变明日巨星。”采访：方骞平

伍咏薇任《造星V》首轮评判责任重大，她称好有使命感。

 

入行34年，歌影视主持瓣瓣掂的伍咏薇获ViuTV高级Writer邀请，拍住近年获奖无数的知名音乐制作人陈浩然（Edward Chan）及票房大收7734万港元的《饭戏攻心》导演陈咏燊(Sunny)，齐担任《造星V》首轮比赛评判。伍姑娘想为香港娱乐圈出一分力，帮手拣选新力军而胆粗粗答应，笑言从94位参赛者中拣60强的马拉松式过程，好似俾人过咗一栋咁。

Edward(左起)、伍咏薇及陈咏燊系新鲜组合，3人做评判擦出化学作用。

 

3人好有默契。

 

唔食唔饮30小时

伍姑娘之前无睇过《造星》系列，只知家阵好红的姜涛及MIRROR出身自《造星》，所以完全唔知首轮要经过马拉松式甄选：“原订喺10几个钟内完成，结果超时录足30几个钟，好记得由年廿八朝早8点开始化妆，一直做到年廿九下午，录完仲挨饿赶去洗头过年。”最紧要靓的伍姑娘唔想唇膏花咗唔靓，录影全程唔饮唔食，“尽量唔离座去厕所，连补妆都系自己搞掂，期间聚精会神听晒参赛者唱歌及讲话，作为一位成熟及专业评判，呢个系我嘅责任，我好认真做呢件事，应该冇乜揿错灯。”

伍咏薇做评判把关得严谨。

 

伍姑娘之前冇睇过《造星》系列，只知道大红人姜涛出身自《造星》。

 

伍姑娘有一套拣人准则，又直认要把关所以手紧咗少少，“如果拣晒前面𠮶啲，后面有正嘢咪好唔公平？我原则系得就得，唔得就狠心啲，就算电我都冇用，如果系叻，唔放电我都会揿，要执得好谨慎，唔好畀错误讯息及希望参赛者，反正只系留多阵，入咗复活区都系死紧，咁又何必喺我手上揿灯畀佢呢？我唔似‘一灯大师’(陈咏燊)咁心软。”

“大马193”Louis边唱《情非得已》边电伍姑娘，伍姑娘不为所动，未有揿灯。

 

首轮比赛评判，伍姑娘要从94位参赛者中拣60强。

 

为效果玩互“睥”

节目见街后，出现多次伍姑娘好早就揿灯，然后身旁嘅Sunny即一脸疑惑望住佢，对此，伍姑娘爆料说：“佢系最专业、最斯文、最受保护嘅，一定唔会‘睥’我。”又指陈咏燊自创‘一灯大师’角色后系咁揿。“佢心地好阿弥陀佛呀，哈！佢真系好心软㗎系咁揿揿揿，咁我会好似瞓捩颈咁，个样带寸厉一厉佢‘𠵱！又揿灯救人呀？’有时我揿灯，佢会好奇怪望返我，我觉得唔错咪揿囉，咁样先系真实嘛，佢‘睥’我几吓，我够‘睥’返佢几嘢，其实我哋系冇嘢只系戏嚟。”

“一灯大师”陈咏燊菩萨心肠经常心软揿灯，伍姑娘忍唔住厉住佢。

 

睇好乐乐同Lyman

90年代曾推出两张专辑的伍姑娘特别喜爱跳唱参赛者，另外对本地的“肥仔”乐乐、来自美国跳社交舞嘅靓仔Lyman(香胤宅)及自弹自唱《Billie Jean》嘅大马Adam(郑如川)最有印象，她再补充：“我钟意装备好嘅参赛者，呢啲先系比赛态度，畀多一次机会对其他人唔公平，正如选美一样，得一次机会，表现唔好冇得赖病。”

自弹自唱《Billie Jean》嘅大马Adam唱歌好高质，但35岁年纪大咗啲。

 

 

来自美国嘅拉丁舞导师香香获奖无数，更加系纽约百老汇剧院表演者。

 

 

伍姑娘睇好唱《Golden Hour》嘅19岁“肥仔”乐乐。

 

 

赛前被视为大热的18岁Owen（王诺言）演出失准，导师陈蕾、冯允谦、陈健安和韦罗莎闯录影厂求情。

 

Owen再获表演机会，但仍未能打动评判被淘汰。

 

 

伍姑娘今次任评判给观众焕然一新感觉，她强调作为演员会因应不同节目带出唔同风格，今次做评判跟《香港先生》功能唔同，非带出娱乐性而系为选新星，有咁好反应绝对系赚咗：“香港搞多啲有质素，唔系造马嘅选秀节目系好事，可发掘可造之材变巨星，最好系本地人。”另外，她又解开“小新眉”之谜，指平日懒化妆，建议师傅飘眉时做深色啲，所以重手咗，加上身形瘦削更显粗眉，搞到连自己都吓一吓。

早年伍姑娘为《香港先生》做评判时戴上氧气罩拣选靓仔猛男，惹来佳话。

 

观众对伍姑娘的小新粗眉好有感觉，笑言挂住望佢条眉都无听佢讲嘢。

 

老公练海棠都赞老婆做得好。

 

伍姑娘系专业演员，TVB剧《金宵大厦2》中演“渺渺”苏皓儿嘅变态妈妈，令人心寒。

 

同阿Bob主持《tiger's talk》乐而不淫，又系另一个作风。

 

伍姑娘喺1995-1997年间做过歌星，96年出过专辑《不再在乎》。

 

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。