独家追踪丨直击64岁宫雪花狂扫减价货拒入更衣室就地试衫 被屈打尖发火闹Sales

宫雪花（花姨）出名骑呢，曾自爆28年前参选亚姐为抢风头专登报大10岁，实际年龄“只得”64岁。骑呢事迹还有同届亚姐亚军黎淑贤（Bonnie），早前受访曾大爆花姨有舖当众换衫瘾，Bonnie冇吹水，《头条日报》有幸直击花姨在时装店狂扫特价衫时，果然有试身室唔入，全程旁若无人当众试衫。而本来扫货扫得好开心的花姨，排队找数时被Sales误会打尖，仲发晒脾气大声闹人兼掉衣架，火药味劲浓。采访：头条娱乐组

花姨当年报称47岁以破纪录高龄参赛，成为一时佳话。

花姨早于1995年参选亚姐时已相当出位，由于赛制不设年龄上限，当时她报称47岁以破纪录高龄参赛，成为一时佳话，更成功夺得第五名，兼获“最受传媒关注奖”。不过相隔28年，花姨对台湾传媒承认当年讲大话，更即场展示身份证，确认今年只是64岁（1958年5月19日出生）而并非74岁。

花姨同黎淑贤是同届亚姐出身，分别夺得最五名兼“最受传媒关注奖”及亚军。

专攻缤纷妹仔衫

今年初，黎淑贤接受电台访问，大谈当年选亚姐的绝密旧史，包括选美黑幕，还大爆花姨在巴黎拍外景时的惊人爆笑举动，“当时买完嘢上返旅游巴，佢竟然喺车上换新衫！”她又指因花姨行为出位，令站在她身旁的佳丽都黯然失色。

黎淑贤同杨玉梅受访，大爆花姨参选秘闻。

习惯嘅嘢好难改，而花姨呢个当众换衫的举动，28年来完全冇变。日前晚上8时多，本报记者在九龙湾德福商场发现花姨单拖逛时装店，由于花姨身穿白色通花外套及喱士长裙，内衬桃红色背心加踢对拖鞋，仲要戴住黑色闪石Headband，由于造型完全九唔搭八的关系，一眼就认到系花姨。见她主攻减价货品，专拣$129至$259，好Colourful、好妹仔款的贴身衫及短裙，或者价钱太吸引，花姨拣咗一大堆衫待试，以为佢会排队等更衣室试衫，估唔到佢索性就地试身。她先除下通花外套试上身衫，见佢将一件粉红上衣套落桃红上衣，照完镜再除出嚟，之后再将中码的绿色短裙仔套喺原本条喱士长裙，不禁要赞吓花姨又除又剥都全程冇走光，但当众试衫的行为相当唔正常，同场顾客经过都畀佢吓一吓，不断回头望佢。

一身白色通花加喱士加桃红的花姨，见到减价衫即兴奋狂拣。

睇得出花姨训练有素，又着又除都完全冇走光。

花姨试着中码短裙，本身已有条长裙加上Size唔啱，拉唔埋拉链都好正常。

花姨虽然64岁，但人老心唔老，睇中嘅裙仔几Cute。

花姨边试边不停叫Sales攞大码畀佢。

爱性感打扮嘅花姨，对小背心爱不释手。

Sales误会想打尖

花姨扫货扫得兴起，不断边试边叫Sales攞大码畀佢，最终试足成个钟拣咗10件衫。最后睇埋耳环，冇嘢啱的花姨就去排队畀钱，可能因为佢排队时唔肯企定定，挂住攞旁边啲货品嚟睇，结果令Sales误会佢想打尖，开声话佢打尖会对其他顾客唔公平，被屈的花姨即时扯火先掉衣架，再发脾气大闹Sales：“想公道嘅去揾法官啦！”不过虽然花姨被误会好嬲，但为咗一堆好抵嘅衫将骨气放埋一边，照畀钱，最后10件衫裙盛惠1300蚊，疯狂Shopping完再坐港铁离开。

睇完一轮衫，花姨再睇首饰，逐件耳环埋镜拼拼。

花姨被Sales误会想打尖，即扯火将衣架连衫掉上柜枱，更大闹sales，“想公道嘅去揾法官啦！”

花姨被Sales误会想打尖，即扯火将衣架连衫掉上柜枱，更大闹sales，“想公道嘅去揾法官啦！”

最后拣咗10件衫裙，埋单超抵只需1300蚊。

《星岛头条》新网站有更多精彩内容：http://www.stheadline.com/