【曾智华专栏】自恋狂导游

旅游大湾区，觅美食，当然要事先做足资料蒐集，然后拜托当地导游安排。
　　
旅行团导游，工作角色清晰，由团抵埗迎接开始，令所有团友安心，宾至如归，协助人人解决沿途问题。食肆景点预早安排妥当，以确保冇甩漏。之外就是在车上“娱宾”，包括讲典故及笑话，间中可以唱首歌仔，总之就是令大家开开心心完成旅程。
　　
导游绝对唔易做，因团团客人“品种”不同，各有性格、喜好及情绪，有的孤寒，有的大方，有的具修养，有的烂挞挞，故此，成功导游绝对是个超级公关，手段之圆滑非比寻常。
　　
小弟年轻时惯性跟团旅游，撞上的导游起码几十个。有趣，上周到顺德旅游，碰上的竟是非常新鲜的一种——自恋狂！
　　
超级搞笑，佢一上旅游车开咪，就话：“各位，我叫阿红，人人话我似钟楚红！”
　　
起初大家以为佢搞烂Gag，故此应酬式回报一下：“系㖞，真系好靓女㖞！”
　　
点知原来错！佢见大家咁反应，进一步狂赞自己，要几肉麻有几肉麻：“其实有次我参观博物馆，见到著名的宋家三姊妹相，咦⋯⋯乜原来宋庆龄同我有八成似，于是立即企埋展览相旁合照，拎返屋企畀阿妈睇，佢都话真系好似啊，大家可以传阅㗎！”
　　
真真顶佢唔顺，做导游做到可以咁，简直大开眼界。不过，原来未完，更“大镬”跟住上。
　　
红姑面都唔红话：“好多朋友认为我其实可以做粤剧名伶㗎。嗱，咁吖，等我播一首《万恶淫为首》畀大家欣赏吓，唱腔唔差过新马师曾㗎！”
　　
喂，佢并非讲笑，原来嚟真，跟住播出大锣大鼓用哀怨腔口演绎《万恶淫为首》录音。
　　
红姑究竟知唔知，其实自己系做乜的呢？