独家丨周吉佩助情绪病歌迷重生感动爆喊 兴奋自爆结束7年夫妻分房瞓局面
36岁周吉佩（吉吉）获《中年好声音》冠军后人气急升，生活出现重大变化，“吉s粉”(Fans暱称)激增5倍。日前吉吉兑现有幸得奖就请食饭承诺，自掏腰包柯打到会和近百位歌迷会会员庆祝，期间感动落泪。事业有起色之余，他跟落选港姐太太黄彦欣亦已同牀“合体”，结束7年多分房瞓局面，更开心自爆：“夫妻关系有升华。”采访：方骞平
周吉佩最近工作停不了，但仍忙中偷闲跟“吉s粉”庆功：“当晚冇请食鲍鱼，但食泰菜都好好味㗎，希望过多一段时间我有更大嘅进步，攞到更好嘅成绩，到时再请大家食好啲啦。(咁下次系咪食鲍鱼呀？)我真系唔敢应承住，怕开大咗个头收唔到科呀。”
帮助Fans揾到奋斗目标
吉吉最意外歌迷会成立短短个多月人数激增，由4月中只得20人参与首次聚会，𠵱家会员近百，年龄层由5岁到50几岁，当中有跟足他15年的忠粉：“见到咁多人支持自己，真系好感动，一直以嚟希望以歌会友，今日终于做到，佢哋系我嘅动力。”而最令吉吉感动是可以帮到患病Fans，“有食情绪药多年嘅Fans DM我，佢15年前买咗我唱片，但一直放喺柜桶，直至见到我参赛，被我追梦故事打动，激发佢揾到奋斗动力，情绪病不药而愈，呢件事令我好鼓舞，冇谂过自己有能力用生命影响生命！”
发表冧妻宣言无人取代
歌迷会活动上Fans为吉吉订制吉字蛋糕，现场又播放他唱《留给世上我最爱的人》的参赛片段，台下不少人感动落泪，当然包括主角。当晚除大合唱外，吉吉又演绎15年前处男歌《家教》，由于歌曲讲述爸爸对他的教导，做了爸爸的吉吉，重新演绎感受更大。另外跟Fans跳唱《跳舞街》掀起全场高潮：“连孻仔Jasper都兴奋到清唱两句，老婆又同班Fans玩埋一份。”对于多咗女Fans，吉吉强调老婆唔会呷醋：“成立到歌迷会要多谢吉太，佢负责同Fans沟通，Fans钟意佢多过我。”他又发表冧妻宣言：“我人生所有嘢交晒畀吉太管理，佢系我心目中No 1女神，无人可以取代！”
老婆怪佢爆晒家事出嚟
吉吉成为大忙人，他坦言老婆有啲唔开心，“我哋连一齐食饭嘅时间都冇，不过佢挂住我多咗。”对于之前投诉自大女Imogen出世返家第一日，老婆要陪小朋友瞓，将他被铺掉去细房要求分房瞓，经他狂呻后问题已得到改善，最近一对子女已搬入细房，两公婆终能“合体”：“其实系要时间嚟说服孻仔，𠵱家佢5岁，大个仔肯自己瞓。以前两公婆会为分房瞓而闹交，不过知道太太好锡小朋友，互相迁就唔会怪佢，佢反而责怪我乜都讲晒畀人听，但佢听返访问，又话我讲得几好笑，唔介意我坦白，坦诚系我哋沟通方式。”最后吉吉笑说：“分房7年，𠵱家两公婆同牀反而有啲唔惯，因为自己反瞓，成日嘈醒吉太，哈！但佢就好钟意我啲鼻鼾声，话好有安全感㖞。”忙到天昏地暗，吉吉笑说同牀都冇气冇力制造“小吉吉”
《星岛头条》APP经已推出最新版本，请立即更新，浏览更精彩内容：http://www.stheadline.com/
>>>星岛网WhatsApp爆料热线(416)6775679，爆料一经录用，薄酬致意。
>>>立即浏览【生活百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。
