【曾智华专栏】谁大谁恶谁正确？

早上撞入地踎茶记，大群的士粗豪（口？）佬又在声大大开《城市论坛》，肥佬B口水喷窒：“顶头球，真系谁大谁恶谁正确！”
　　
起初我以为佢又在描述某某位高权重大官，又或啲乜乜“江湖恶人”，原来唔系，系讲紧冠军骑师潘顿。
　　
潘顿早前扬言“唔玩喇”，表示会返澳洲。当时小弟一听，已闻到阵阵“吊高嚟卖”味道，摆明想讲数！
　　
今时今日潘顿在香港，以“只手遮天”形容不为过，真系赢输随意，马场之内打横行，因佢一人孭起大量投注额。事实马会已经冇咗莫雷拉（理由神神秘秘，冇人敢爆），若再冇埋潘顿，“以投注额为本”的马会高层肯定踢晒脚。事实佢哋若想收千万元到几千万元年薪，必须睇住个投注额做人。所以，唯有“秘密”与潘顿讲数，公布出来的，起码是给予更大自由度。
　　
“凤凰潘”享有的条件，其他骑师有冇呢？骑骑骑，发吓梦就有！
　　
其实肥佬B指出的——谁大谁恶谁正确，根本个个圈皆如此，乃“阿妈系女人”现象。
　　
不过咁，只随口呻或揶揄的，冇一个懂得拆解为何如此的深层真象——为乜佢哋可以升到“又大又恶又正确”位置？天跌落嚟？树生出嚟？难道潘顿在做见习生时有此牙力？儍嘅先以为一切是偶然发生的。
　　
马会“怕咗”潘顿，因佢的确超级犀利，至今累积头马迈向一千六百场，乜嘢大赛都赢过。未到港前，在2002年已是澳洲布里斯本冠军骑师。多年来，不断提升自己骑功，终于成为“香港一哥”，所付出血与汗，再加过人天分，一千个骑师也难有一个如此！
　　
好，讲吓明天“皇太后纪念杯”，三级赛大长途，让磅。我选“直线力山”及“表之五知”，皆进步中！