【曾智华专栏】今晚𥄫实“旭日晖”

大家可有发觉，近两次赛事投注额相当乏味？原因简单，早前跑礼拜六，大家零舍冇兴奋感。此外，就算周日，也是戏码麻麻。

大战前夕，赛事宁舍冷清，因一切注意力都去晒四月三十日《冠军赛马日》，马迷重锤意欲当然麻麻。

不过，如此日子也可能有人部署食大茶饭㗎。睇睇上周日赛事就知，竟然爆出四场二十倍过外W！正常日子边会“咁玩法”？

值得一提，马迷最高兴是见到榜尾练马师何良，撚一只个个以为佢接近“垃圾级”的转仓马“梦巴黎”，竟然似识变魔术，上手练马师伍鹏志安排此马出赛五次，有四次输十至二十个马位，恍似不知竞赛为何物，根本冇大马房肯收！

结果掟到落榜尾一族的何良马房嘞。当大家谂住此马应该等退役之际，喂，唔系啩，上周日出赛，配个二线骑师仔潘明辉，竟由头带到尾胜出，更赢埋只香港评马同业协进会杯！究竟何良畀咗啲乜嘢“仙丹”只马食，又或用咗乜嘢神秘操法，可令只马脱胎换骨呢？全世界想知！

不过，说来若何良有“神级”秘技，又点会搞到成日护级噃？真令人摸不著头脑。

当日本来雷声甚大的郑俊伟马房，竟然一W都冇，连镇仓宝“满欢笑”也只能跑个第四，真无奈，继续挨可也。

今晚跑快活谷C加三栏C加六弯，内档着数晒，尤其短途，冷冷都要拖一票。有只“蛊惑马”小弟会𥄫住，正是韦达马房的“旭日晖”。报名时用波健士，出赛改用布文，抽得五档。此马共出赛六次，全跑沙田，从未跑近过。今番突改到快活谷，韦达之前摸过，可能有计，一于跟返多少，睇佢搞边科！