独家丨39岁邓丽欣享受单身：无牵挂都系一种幸福 拍《12日》心痛角色被爱情折磨爆喊
相隔23年，电影《十二夜》的姊妹作《12日》终于面世，女主角由张栢芝变成邓丽欣（Stephy）。演足10年的Stephy角色跨度大，加上情绪起伏，曾拍到崩溃爆喊，难度极高。16年跟拍拖10年的方力申分手后，Stephy曾恋王子（邱胜翊），至今单身两年，而小方近月认恋卷韩国邪教性侵案的叶萱，Cookies好姊妹亦相继结婚做妈妈，不过，39岁的Stephy因电影令她反思婚姻关系，庆幸未有组识家庭，更非常享受无牵挂的自由生活。采访：杜杜 形象:Queenie Yu 发型:Vince pang@IL COLPO group 化妆:Cyrus Lee服装:Miu Miu
2000年《十二夜》上映时，17岁刚出道的Stephy有入埸睇，多年来亦重温过无数次，每次感受都不一样，因爱情经历与日俱增，对于这部经典作有更深刻体会，“以前会当故事去睇，𠵱家会觉得系好残忍嘅现实反映。”《12日》是导演兼编剧林爱华本为张栢芝度身订造之作，但现在改由Stephy主演，她不怕跟张栢芝比较，“度身订造系咪真系只有𠮶个人可以做到呢？一定唔系，同埋《十二夜》都经历咗20年，连导演想法或者想呈现嘅嘢都有唔同，唔需要去理或者太担心，我就用我嘅方法去演活呢个角色。”
开镜冇耐就要拍牀戏
《12日》讲述读书开始相遇的小情侣，到进入社会工作后结婚再面临分开，横跨达10年，Stephy庆幸现在才遇到角色“Jeanie”，经历多了才令她更容易驾驭，“如果唔系经历过唔同嘅爱情，或者多咗咁多经历，可能有啲嘢未必理解得到，虽然我冇结婚，好多结咗婚嘅人都同我讲同拍拖唔同，‘你结咗婚就知㗎喇’，而我身边好多人结咗婚，所以都略知一二。”
首次跟马志威合作就有很多亲密戏份，Stephy承认最初确实好担心，加上开镜初期便要拍牀戏，令她更加紧张，但后来她的想法却180度改变，“我收到通告时谂‘系咪真系要咁安排呢’，后尾我发觉其实咁样都好，反而冇咁尴尬，熟咗仲尴尬，同埋几啱个角色要表达佢哋成日貌合神离，𠮶种沟通不良系啱𠮶种氛围。”
超理性拍拖唔兴嗌交
《12日》的模式跟《十二夜》一样，以12天来表达一段爱情故事，Stephy表示拍摄时令她反思了很多，“有一日讲个女仔想自杀，觉得冇咗呢个男人好似冇咗一切，有时爱情真系会令人盲，打唔开心结，对一样嘢太沉迷太执着，完全揾唔到出口系好sad，呢样嘢令我更加扩濶咗思维，人适时要放下一啲嘢，拎起好易但放低好难，真系需要学习。”由于角色情绪起伏大，她拍摄时一度爆喊，“其实𠮶场戏唔使喊，cut咗机之后反而喊，因为𠮶种情绪困住喺心，呢段关系咁样真系好攰，真系忍唔住。”
不过她庆幸自己天生超理性，未试过为情而钻牛角尖，“我天生理性系大于感性好多，好似真系好冷血，同埋我唔开心会畀时限自己，第一日好唔开心，第二日唔得要减一半，第三日系最后一日，第四日要放低！”理性的她连跟男友都好少嗌交，“我钟意讲道理，嗌交一定讲啲伤害对方嘅废话，冇必要我伤害你你又伤害我，我想大家冷静咗去讲返件事，唔好俾情绪牵动去倾个问题。”
钟意BB唔一定要拥有
2021年6月Stephy宣布跟王子（邱胜翊）结束3年姊弟恋后，一直未有新恋情，39岁的她未有太羡慕朋友组织家庭，反而乐得轻松，“有时谂吓我𠵱家都几舒服！哈哈！譬如我嚟紧要去第二度拍戏，工作人员都系挂住小朋友同另一半，我乜都唔使牵挂，可以做我钟意嘅嘢，亦都系种幸福，当然有𠮶种牵挂𠮶种爱都系幸福，睇你点样去取决囉！我系喜爱自由，最多系牵挂只狗年糕同埋妈咪囉！”
Stephy承认现阶段对婚姻已没特别憧憬，只信缘份，“我以前成日会谂究竟婚姻系咩呢？需唔需要婚姻呢？𠵱家嘅我冇畀自己答案，讲到尾都系缘份，就算结咗婚到最后点其实都系缘份，要睇两个人缘份去到边度，我冇刻意去谂或者去强求，需要或者唔需要，我不嬲都好怕畀自己界限，冇嘢系一定，会舒服啲，唔需要畀自己压力。”对于生下一代她一样不强求，“钟意唔一定要拥有，钟意小朋友咪玩吓人哋𠮶啲囉！”
《星岛头条》新网站有更多精彩内容：http://www.stheadline.com/
>>>星岛网WhatsApp爆料热线(416)6775679，爆料一经录用，薄酬致意。
>>>立即浏览【生活百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。
