【曾智华专栏】贴马有咁准已好正

若小弟投注赛马有咁准，应该已经发咗达！讲乜？正是讲上周本栏预测《第41届香港电影金像奖》胜出名单，一共十三项，结果中咗七项，刚刚过半！
　　
重温一次，中咗：一、最佳电影；二、最佳女主角；三、最佳女配角；四、最佳剪接；五、最佳新导演；六、最佳美术指导；七、最佳服装造型设计。
　　
其他唔中的，个别有啲唔服，不过又唔系由我选，大致讲，多年来由专业电影工作者选出的，基本颇得人心。
　　
今届狂大争议的，当然是最佳电影由《给19岁的我》夺得。结果公布后，社交媒体爆出“雷动反应”。N咁多人问小弟点睇？也有记者要求访问。睇嚟系因反对声音唔细，故想揾人解释一下点解圈内人推举此片啩。
　　
其实记者要追访的，应是有票在手的评审，而非小弟呢类凭直觉判断的塘边鹤。
　　
个人观察，《给19岁的我》事件已发展到非常情绪化。看看网上如洪流的批评及攻击，部分虽仍希望以理服人，但更多的是诅咒、谩骂、粗言秽语。整个氛围，完全不利客观讨论/辩论。
　　
事实，我在自己的社交平台，也Block咗几个情绪失控、连串粗口烂舌者，希望佢哋改去“同道组”，大家价值观及文化太大差异了。
　　
说来，电影金像奖只一年一次，早已公布举行日子。故此候选者为尊重自己，尊重大会，尊重整个电影业，理应全部出席。但结果个别明知多数输，唔想“做啦啦队”者，纷纷用“度唔到期”做借口缺席，实在太小器。喂，系咪若你赢，人哋陪坐抬桥就得，倒转你抬下轿就死唔肯蚀底？
　　
边个如此？我唔会写出来，其实大家当晚有睇直播的，当然一清二楚！