【曾智华专栏】方仔潘顿暗“互片”？

今晚又跑快活谷，未分析赛事，先讲上周夜赛。我发觉有个现象不寻常，正是“方潘互片”疑云。再追查下去，直觉事有跷蹊，不知各方高人可否点醒一下，查找“真相”。

话说四度香港冠军练马师方嘉柏，旗下拥有六十几匹马，次次赛事皆有马出，但奇，过去两年多，竟与五届香港冠军骑师潘顿恍似绝缘，一次都冇合作，实在不太合理！

不但不合作，上周谷中赛事，竟发觉两人可能暗暗较劲互片，作针对性部署。

方嘉柏素称“谷中之王”，最擅长在跑马地夜赛开大茶饭。吼准一日，唔声唔声连环直落杀几场，单单过关W，已可食足一世！

上周赛事，“咖喱仔”明显又要威水又要掠水，身为“西洋仔”，安排劲马“黑桃火箭”跑西洋会杯，目标为攞奖外，再𡁻四只W，分别为“星运明爵”、“国士无双”、“赤子雄心”及“紫云冰”。

成个部署，连我呢类儍下儍下马迷都睇到，其他圈内人当然更心领神会。正路做法，绝不阻人一年一次揾食，家家有求嘛。

点知就在方仔这个重要日子，潘顿竟玩“队爆”，骑只“喜莲勇感”，沿途睇住“黑桃火箭”（巡逻影片显示，佢真系睇咗好多次）跑，最后五十米更博老命，摆明要炼低对方，似有仇口咁款。

最终赢短马头，肯定吹胀方仔！不过，方仔到尾场也还以颜色，当潘顿骑大热“胜神威”冲线时，最后一步被方厩“紫云冰”擒下。

当晚本来方仔坐硬五W，结果畀潘顿拦路，冇咗天文数字金钱。呢啖气，势必造就日后另一场好戏！

今晚又如何？我专注研究两个明刀明枪争冠军马房！

蔡厩要“二隽”、“波尔多”及“奇宝”，姚厩则选“觔斗云”及“精彩生活”。