【曾智华专栏】唔声唔声吓你一惊

上周日早上，手机弹出短信，来自对马匹非常有研究的资深马主“劲F”：“碌Sir，今日郑俊伟有机会做练马师王，捧多少啦！”

即刻睇睇赔率，二十八倍。排在姚、吕、东、贺、希、伟、黎及叶八个马房之后。喂，马会的操盘手好精准㗎㖞，若有机会，点会开个咁冷的赔率呀？

不过，风水佬呃你十年八年，“劲F”有冇料到，几小时内即揭晓！是日郑厩出五匹马，左睇右睇都唔似囉。

开呀！先来第二场只“剑聂风”，输十四个马位，跑尾二！第四场更大大镬，只“菲力大帝”跑到仆低，将骑师杨明纶先抛下再压住，搞到杨仔颈椎受伤，幸而无生命危险。喂喂，黑成咁，仲有机会做练马师王？
　　
事态发展下去，非常出人意表。郑俊伟先赢第五场“满欢笑”，独赢赔率五倍，次热门身分W，唔算奇。

但跟住奇事发生！下一场佢只“年年友福”完全冇过关飞，兼且冷到标汗，四十一倍！意即连幕后人都冇买，才会冷成咁。

哈哈，难以置信情况就在此场发生，冷门骑师贺铭年，突然马神上身咁款，一条直路如飞杀上，㓥咗潘顿只一点九倍全热门“马主雄风”，立时全场鸦雀无声。

大结局系郑俊伟再在第九场轻风送爽，W埋只大热“晴王”，至此，正式成为“练马师王”，冇得唔服。

这个本属尾四的马房，终于龙穿凤，唔使裤穿窿，毕业有望矣。

好嘞，今晚齐齐“食泥”，玩全泥赛。呢类赛事安排，一季甚少，故泥地马当然要趁机起筷。

蔡约翰被姚本辉追到气咳，“蔡氏宗亲会”的罗富全要扮演“拦路虎”喇。佢两只有机W，分别为“顺势而飞”及“年少有威”。另一只阿蔡的“明骏福星”也要睇，携手顶住姚厩。