独家丨马国明呻男艺人之苦:拍亲热戏觉得你搏懵 曾助岑丽香同监制拆掂唔拍咀戏
马国明相隔13年于《隐形战队》再演警察,更自夸拍动作戏又fit又有型,因为开枪可以唔眨眼,“呢套戏我系No.1”。讲到同刘佩玥(Moon)的亲热戏,他强调事前唔使同未婚妻汤洛雯(靓汤)通报,同样亦唔介意靓汤拍亲热镜头,他坦言:“电视尺度冇咩可以拍到出嚟啦。”另外提到可以再跟佘诗曼合作,马明双眼发晒光表示好期待。 采访:杜杜 摄影:谭志光
马明在《隐形》演总督察“Ocean”,虽然有大量动作戏,加上开拍前两星期才知顶替陈展鹏,但好彩他有踢开波,体力上唔难应付。招积位仲有一项,就是开真枪可以唔眨眼,“呢套戏我系No.1,唔系训练有素,我都唔知点解,阿Moon就话我点解拍枪战又唔眨眼,耳仔又唔使塞绵花,因为我样样感官都迟钝过人,我又真系冇佢哋咁敏感,哈哈!但系镜头出咗嚟,我都觉得自己有型。”
唔介意代女拍档出声
讲到跟Moon的亲密场口,马明出席记招坦言熄电视唔敢睇,准新郎解释只是搞吓气氛,“监制文伟鸿会安排吸引观众眼球嘅戏,揾靓女着得性感,再用性感去包装喜剧感觉。”不过他承认拍此类场面较女演员更尴尬,“熟还好㖞!大家知咩事,如果唔熟去锡,导演又嫌唔够,睇镜头唔觉好爱要做多啲,唔知个女仔点谂,会觉得你搏懵,呢啲唔熟就会好尴尬囉!”
马明拍亲热戏前唔使向靓汤通报,“好坦白讲电视尺度冇咩可以拍到出嚟,最多拍个意识畀观众睇,好多嘢出唔到街,𠵱家《隐形》8点半出街,合家欢时间,好多嘢做唔到。”马明亦唔介意靓汤拍亲热戏,一齐睇之余又会研究点样拍,“仲话佢‘你系咪拍得好辛苦,扭晒360度咁,扭住个身去锡’。”而靓汤就当然唔想睇未来老公同人亲热啦。马明指婚后唔会避忌拍亲热戏,但会担心女拍档感受,亦唔介意帮对手同导演拆掂佢,“有时遇到啲新人,唔够胆做到剧本咁。我反而介意佢唔出声,又拍得唔开心,拍戏最紧要大家开心,拍唔到𠮶个效果不如唔好拍啦!尴尴尬尬10 take都未搞掂,嗱嗱声1 take搞掂咪好,我又可以返去睇猫,哈哈!大家早啲收工。”他又提到曾经助岑丽香跟监制商量避拍亲热戏,合作更加舒服。
期待向阿佘好好学习
马明讲明婚礼决定权交晒畀靓汤,自己只负责配合,而他预计婚后会以家庭为重,就好似陈豪一样,“我同佢拍《白色强人II》,佢一收工就赶返屋企睇小朋友,哈哈!我谂我将来都会系咁,我𠵱家养咗两只猫,有时出街出得耐,开工长时间,都好想返去望一望佢哋,阿汤喺屋企都好啲,如果阿汤又有嘢做,我都会成日心挂挂,我谂同养个人仔差唔多。”
讲到继2017年《赌城群英会》后再跟佘诗曼合作新剧《NEWS新闻女王》,马明相当期待,因为好享受跟阿佘合作,“首先阿佘好专业,演技真系好好,虽然我做咗咁多年,有时有啲嘢睇唔透或者有两、三个选择时,我都会问阿佘用边个fit啲,男仔同女仔睇又唔同,阿佘系好畀到信心你嘅对手,佢选择得90%唔会错。”他认为阿佘在内地发展几年,拍过好多好劲的监制及导演,战斗力会再提升,“会抱住一个向阿佘学嘢嘅心态,虽然我大过阿佘,但阿佘做主角时,我仲系做紧甲乙丙,好似《十月初五的月光》就系佢澳门大学同学甲。”
新网站 www.stheadline.com 已推出
>>>立即浏览【移民百答】栏目:新移民抵埗攻略,老华侨也未必知道的事,移民、工作、居住、食玩买、交通、报税、银行、福利、生育、教育。
>>>即读【新移民专栏】:新移民第一身经验,与你分享当下年轻移民生活日常大小事,即读“新移民专栏”。
iPhone:https://apple.co/2IBi812
Android:https://bit.ly/2Pe8anu
>>>订阅【加拿大星岛网电邮快讯】,每天可收到最快新闻资讯电邮:
https://www.singtao.ca/subscribe/singtao.php
>>>立即关注加拿大星岛新闻网TG Channel,让加国新闻无遗漏全天候向你推送:
https://t.me/singtaoca
>>>订阅CCUE YouTube 频道,查看更多吃喝玩乐、生活资讯影片。