【曾智华专栏】替你订枱冇问题，但⋯⋯

早前在本栏写过一篇《坚决永不代人投注》，有颇多回响，原来不少人有同样遭遇，就是替朋友下注，一片好心帮忙，结果因小小失误，填错个号码，惨情，中咗。理所当然被埋怨，最弊以为你落格，从此连朋友都冇得做，你话出心帮人搞成咁，几戆居？一次嫌多，从此痛下决心，谢绝一切代下注的要求，以免重蹈覆辙！
　　
其实作为朋友，真的是有义务帮得就帮的，小弟出心也如是。不过，帮人也不时帮出“一肚气”。结果也如坚拒代下注一样，边个要求都Say No！系乜呢？正是买演唱会飞。
　　
在电台工作时，理所当然大量唱片公司与你“好好关系”，故此，要买演唱会飞，无论几巴闭天王巨星、几抢手门票，都会“好容易”。
　　
于是，自然生张熟李、远房亲戚、多年冇联络旧同事，都会不时出现：“碌Sir，帮手扑几张XXX演唱会飞得唔得？拜托！”
　　
起初以为Easy Job，打个电话就掂，岂料原来呢个世界乜人都有。当我代畀晒钱，门票到手，通知对方攞得时，烦恼就出现。包括：一、刚刚𠮶日唔得闲，麻烦代换另一日；二、唔好意思，都系唔睇啦，你揾人要咗佢啦；三、咦，唔系几好位㖞，可否再画过⋯⋯大佬，你估我打你工乎？以后一概咪揾我。
　　
近年因小弟四围食，故与不少食肆关系不错，于是又涌现另一类要求——帮我订枱。
　　
帮人当然冇问题，不过，经历多次“冇瘾过人”经验后，要声明嘞：“帮你订枱/房后，请自己跟进一切，包括写菜及要改期！仲有，小弟并不保证必定好食，因大师傅可能休息、心情唔好、挂住跑马⋯⋯任何不满，请不要向我投诉啊，拜托拜托！”