“御用恶人”王俊棠80年代同梁家辉行时装骚 做Disco门卫获李修贤相中露股裸跑
现年66岁的王俊棠加入TVB 26年，擅演恶霸、打手、社团人物等角色，是TVB“御用恶人”之一，近年他在《爱．回家之开心速递》饰演池富，恶得来又搞笑，深受观众欢迎。最近王俊棠接受演艺人协会访问，畅谈当年被李修贤发掘去拍电影，之后加入TVB成为“御用恶人”的经过。王俊棠由于儿时不爱读书，父母为他报读香港航海学校，毕业后便开始行船，后来因为一次意外脚部骨折，康复后他决定留港跟朋友做警察。不过因为警察工作太过沉闷而再度行船：“最后因为我亲生细佬意外离世，得返我一个仔，我决定留返喺香港做嘢。”
【点击睇王俊棠全裸拍戏】：
80年代，王俊棠在夜场“Disco Disco”工作：“198几年𠮶阵，李修贤同王钟两个导演落嚟揾我，问我有冇兴趣拍戏。其实𠮶个年代我已经做model，𠮶阵识咗梁家辉，一齐去澳门行过catwalk。”当时王俊棠在王钟执导、李修贤主演的《流氓公仆》全裸演出，他透露：“我系一个心理变态嘅摄影师，畀修哥（李修贤）带上露台剥晒衫裤，𠮶阵已经好犀利，我要裸跑，OK嘅，跟住之后好多个都裸跑，成龙又裸、洪金宝又裸。”不过王俊棠当时并无签约李修贤的电影公司：“佢哋揾我开工我就去。”
后来TVB前监制邝业生构思《陀枪师姐》时，找来王俊棠饰演以“贼王”叶继欢为原型的角色：“所以我喺1997年𠮶阵入咗去（TVB）拍，当时仲未签约，只系拍一部。后来拍完《陀枪师姐》，监制李添胜揾我饰演鳌拜。”不过王俊棠却认为《鹿鼎记》中的演鳌拜是他从演以来最失败的角色：“我做得真系失败，唉。未拍过古装，出面拍电影全都都系时装。同埋我演绎冇去钻研得咁紧要，起码把声都要用一个比较低沉嘅声线，声音、语气都要气，而且（当时）经验唔够，边做边学，做戏唔系咁简单，一个奸角可以有好多种演绎方式。”
对于被称为TVB“御用恶人”，王俊棠笑说：“都好嘅，起码你揾恶人，第一时间谂起我，啲监制全部唔使casting。”不过他却表示，原来不想只做恶人：“当然都唔系咁想做，其实有啲比较黑色幽默、面恶心善嘅角色，都可以做啲比较傻嘅角色。而家我做《爱．回家》都系市井之徒，又贪慕虚荣，唔系大奸大恶嘅角色，希望多啲机会拍吓多啲，傻佬都冇所谓。”而时他最想做“正气”角色：“畀返人睇我唔系咁奸。”
近年囝囝王东泰入行做艺人，王俊棠提到父子关系似朋友：“我有两段婚姻，同前妻嘅大仔唔系同我哋住。我同细仔相处（王东泰）嘅时间，佢已经好大个，有自己思想，每个人都系独立个体，唔能够控制佢，佢自己想点就点，只可以支持佢，除非佢做埋啲犯法嘢。佢都有同我讲（入行），佢自己话要考，我唔会阻止，一定要畀小朋友自由发挥，身体健康、开开心心就够。”
>>>星岛网WhatsApp爆料热线(416)6775679，爆料一经录用，薄酬致意。
>>>立即浏览【生活百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。
