【曾智华专栏】匪夷所思求解释

睇电影，小弟睇咗几十年，乜嘢片种都有，算是影痴。睇得电影多，自然欣赏能力日比日高，故此，近年预测金像奖（奥斯卡及香港）得主，平均八成中。因为由制作到演技的高低，其实好易分，尤其行内人选出的，绝少离晒大谱，多令人口服心服。
　　
今早九点，一年一度奥斯卡颁奖礼又举行，这个全球荣誉最高的奖项，当然万众瞩目。
　　
大家可记得，上届更是“瞩目中的瞩目”？因发生了韦史密夫惊人失仪的掌掴事件，搞到成个颁奖礼被骑劫，变为一镬烂粥。
　　
基于此，今年大会特设“危机小组”，以防直播时有人发癫，失礼死全世界。
　　
今年睇所有“热身”颁奖礼的走势，似乎《奇异女侠玩救宇宙》又将横扫奥斯卡。
　　
今日小弟真要问问香港的影迷，有几多位明白，呢套“神怪片”有乜咁巴闭？有乜超级创意？有乜高段数制作技巧？以及戏中各人有乜令人赞叹的演技，竟能臣服美国一众电影业工会：导演、演员、制片人及编剧公会，被一致推崇呢？
　　
此片在香港上映时，我当然有入场睇，一边睇，一边只觉得此片神神怪怪癫癫哋，且闻到一阵阵几十年前极落后唐人街的“除”，令人觉得导演唔知想搞乜？
　　
最终小弟睇咗三分二，就拍拍屁股走人，觉得少少浪费金钱，事后也冇乜兴趣提及。
　　
哈，匪夷所思，此片咁神经质，竟然被美国一众电影专业人起立敬礼，推下推下，推到上云端，誉之为电影史上不可多得的作品。
　　
而杨紫琼更几乎扫晒各个影后大奖。
　　
系真唔系真㗎？今日小弟公开征求“启蒙老师”，唔该令我开窍，得知吓呢部神怪片点解咁鬼掂呢？