【曾智华专栏】剃完眼眉吐气扬眉

马场，百分百英雄地。个个骑师及练马师皆想赢赢赢，赢马有得威又财源滚滚。不过，一如打仗，你想赢，有冇犀利武器先？
　　
例如美国乃霸权国，恰人可以唔使本外，更分分钟当联合国冇到。炸人，十之六七冇经联合国安理会批准，正因拥有全球最犀利的武器，不少国家皆在其保护伞之下。
　　
同理，放在马场，练马师及骑师，优质马匹正是其“核武”！若唔够子弹，或武器弱鸡，真系讲多无谓，必定被当隐形！
　　
故此，骑练皆瞓身争取最佳马匹。事实，高班马等于印银纸机，有匹“金鎗六十”或“美丽传承”，真系收钱收到手软。
　　
既然高质马咁重要，练马师当然珍而重之，几大保住佢，以免被拉仓。
　　
不过，被拉未到最惨，最惨情是，一匹高质马在你仓内毫无表现，点知去到另一马房，立即脱胎换骨，变咗“犀利核弹”，转仓即胜。咁真真情何以堪，眼眉简直被剃到清清光光。
　　
马迷必定知我讲边匹，正是马主高价购入，希望跑打吡的“直线力山”。本养在希斯马房，今年头三次上阵皆毫无表现，次次输到甩辘，场场几乎包尾。终于马主罗琪茵决定拉仓，转到方嘉柏马房。
　　
哎吔吔，二月五日在希厩时，出赛仍跑尾二。点知二月二十六日，即二十日后，方仔又安排佢出赛，哗哗，变咗另一匹马，直路如飞杀上，轻松弹离赢！
　　
希斯当然畀人笑到面黄兼揾窿捐，点呢？边处跌低，边处弹返起！周三即发神威赢练马师王，少少吐气扬眉，顶住先。
　　
明天一班千二米，只八只参赛，四只属“蔡氏宗亲会”，真系任佢“开”。我一于捧“速递奇兵”，季半冇入Q，话晒G1马，今场交代！