【曾智华专栏】问佢四个问题

投资世界，一如任何世界，良莠不齐。不过，投资世界更甚的，是涉及金钱。
　　
众所周知，有钱的地方就有骗子。愈多钱的地方，就愈多骗子，合法及非法的皆有。
　　
例如股市，不少投资银行家证券包销商，专教生意人，将旗下生意上市，替佢哋一条龙服务，由执靓盘数，到作个美化未来故事，揾公关公司组织“合唱团”，在传媒大力唱好，然后正式申请。
　　
上市前，更可能揾几个有头有面者“站台”Endorse（当然要畀着数啦）。好嘞，一旦成功上市，先围内再发放多多利好消息，舞到高高，引散户入市，然后“仙女散花”！
　　
你咪以为小弟好醒，早年也中过不少招，本来五十岁时开始，已经人老精，鬼老灵，想呃我？死开啦！
　　
但终于，2017年再衰一次。听咗个漂亮故事，决定买入雷蛇（已除牌，之前编号1337）。本来冇买错，错在畀佢个大老板陈民亮玩咗一剂。此股上市定价3.88元，开市即炒到上5.12元，然后……股价一路“谢过谢老四”，但其实生意不差，似有人为揿低股价，搞到小股东冇晒瘾。终于，突然2021年闪电出手私有化，只畀2.82元！
　　
上市时攞人3.88元，玩完几年私有化变2.82元，明抢每股超过一蚊，呢个陈民亮都算犀利嘞。
　　
今日讲起畀人当水鱼，因有老友问：“碌Sir，有保险集团Sell我，话有只稳阵每年一成回报基金噃，买唔买呢？”
　　
“稳阵？一成？乜有咁大只蛤乸随街跳的吗？你先要个经纪老老实实答：一、系咪签死有年息十厘？二、基金是否随时可沽出唔使蚀？

三、咁笋回报，佢有冇自己借尽贷款瞓落去？

四、点解有啲投资可以十厘回报，但存银行定期只有两三厘，有人儍咗？”