【曾智华专栏】你一定估我唔到

电影史上的侦探片或凶杀片，一定数以千计。杀啊杀啊杀，套套死人，咁点估到剧情发展及谁是凶手呢？
　　
本来太阳之下无新事，你谂到的，其他人也会谂到，咁点跳出既有的思维呢？
　　
呢呢，小弟正有一朋友阿N，脑筋精灵到不得了，一百部凶杀案，起码有九十部睇五分钟，已知边个系凶手，其他十部，也有八部十五分钟之后能准确预知结局，剩返两部也从不用睇到尾。
　　
其实大部分凶杀案，导演都会自觉或不自觉地，早早提供线索，故绝少会出人意表。
　　
好嘞，今次小弟认定，专玩踢爆的阿N，也肯定无法在四分三部戏前，知道这套电影的布局，因实在太难以想像！
　　
此片正是《人肉搜寻2》。四年前《人肉搜寻》公映，票房爆大冷，极度小本制作，只花上七百八十万港元，比不少港产片还要低成本，但上画后大收特收，简直狂收，劲赚七十五倍利润，非常惊人。唔使问阿贵，当然N咁多老板攞住一箧箧银纸，去揾导演安尼逊查格提，求佢快快开第二套，希望又掘中另一个“金矿”。
　　
今次安尼逊唔自己落手，改用上集剪接师韦梅克及尼克庄逊任编导，两人的想像力，你睇完就知，冇得唔服，简直天马行空，脱离一切你能够估到的轨迹。
　　
当然，睇完之后，挑剔友可能批评——大话西游！但从事创作者皆知，能够搞出一套你一边睇，一边想拆局，但又必定失败的戏者，功力点会“大话西游”咁简单。完场前十分钟，观众个个“哦”的一声，服晒，咁都畀佢谂到。
　　
《人肉搜寻2》由开场紧张到尾，根本冇小便位，若非要濑，你一定会死忍，直至真相大白！