【曾智华专栏】电影专业技巧大晒冷

昨日提及《风再起时》作为一部电影，拆开睇，好多瓣值得欣赏。不过，一旦混成一体就有少少弊，明显导演翁子光野心很大，希望拍一部史诗式的香港本土电影。
　　
但问题来了，你要由第二次世界大战讲起，再触及国共之争、殖民地管治、日军侵华、文化大革命、警队贪污的形成、警黑合作、贪污探长之间的恩怨情仇、毒贩横行之因⋯⋯再到廉署成立、警廉冲突、政府高层的矛盾抉择⋯⋯喂喂喂，三五七部都拍唔掂㖞。
　　
你想一套就全部包揽？结果就似英语所讲——Neither Here Nor There，真系有点头头不到岸之感。
　　
热诚冲劲一百分，但炒埋一碟时，立即顾此失彼，冇咗焦点。
　　
尤其内地观众从未经历香港的丑陋贪污日子，根本冇同感。内地唔收得，非常合理。
　　
好，香港又如何？相信上世纪八十年代前出生者，必产生共鸣感，但不似《给十九岁的我》能迎合大部分香港人，尤其年轻一代，会入心入肺。其实四十岁以下的人，怎可想像香港消防员冇钱收唔够火、救护员冇钱收唔抬你上救伤车、警员当街当巷着住制服逐家赌档收规⋯⋯
　　
对佢哋讲，简直不可思议。与小弟这种“有幸”目睹一切的一代，睇《风再起时》，绝对感受不同。
　　
相信此片在香港也不会大收，因冇咗年轻观众，而整套戏的娱乐性也不强。
　　
不过，再讲一次，拆开睇，此片的专业项目，全部一流一，包括摄影、美术指导、服装造型设计、视觉效果及音响效果，理应在这届《香港电影金像奖》大热胜出，实在超班！
　　
个人觉得，单单欣赏以上几个专业项目的超水准之作，已值最少睇两次，甚至三次！