【曾智華專欄】電影專業技巧大晒冷

昨日提及《風再起時》作為一部電影，拆開睇，好多瓣值得欣賞。不過，一旦混成一體就有少少弊，明顯導演翁子光野心很大，希望拍一部史詩式的香港本土電影。
　　
但問題來了，你要由第二次世界大戰講起，再觸及國共之爭、殖民地管治、日軍侵華、文化大革命、警隊貪污的形成、警黑合作、貪污探長之間的恩怨情仇、毒販橫行之因⋯⋯再到廉署成立、警廉衝突、政府高層的矛盾抉擇⋯⋯喂喂喂，三五七部都拍唔掂喎。
　　
你想一套就全部包攬？結果就似英語所講——Neither Here Nor There，真係有點頭頭不到岸之感。
　　
熱誠衝勁一百分，但炒埋一碟時，立即顧此失彼，冇咗焦點。
　　
尤其內地觀眾從未經歷香港的醜陋貪污日子，根本冇同感。內地唔收得，非常合理。
　　
好，香港又如何？相信上世紀八十年代前出生者，必產生共鳴感，但不似《給十九歲的我》能迎合大部分香港人，尤其年輕一代，會入心入肺。其實四十歲以下的人，怎可想像香港消防員冇錢收唔夠火、救護員冇錢收唔抬你上救傷車、警員當街當巷着住制服逐家賭檔收規⋯⋯
　　
對佢哋講，簡直不可思議。與小弟這種「有幸」目睹一切的一代，睇《風再起時》，絕對感受不同。
　　
相信此片在香港也不會大收，因冇咗年輕觀眾，而整套戲的娛樂性也不強。
　　
不過，再講一次，拆開睇，此片的專業項目，全部一流一，包括攝影、美術指導、服裝造型設計、視覺效果及音響效果，理應在這屆《香港電影金像獎》大熱勝出，實在超班！
　　
個人覺得，單單欣賞以上幾個專業項目的超水準之作，已值最少睇兩次，甚至三次！