【曾智华专栏】点解陪明星睇星？

万众期待的《风再起时》今日上映，小弟将第一时间飞身入场，之后再讲看后感受。
　　
不过，睇报道，个心未免一沉。因此片内地票房出奇地麻麻，只得三千几万元，真是“爆大冷”！因理论上，单单摆出两大金像奖影帝梁朝伟及郭富城，常理看，也必亿亿声啦，点解会“搞成咁”？我都想知。究竟是否中港两地的观众，品味及要求完全不同呢？
　　
此片导演翁子光，撮合两影帝过程，也搞到一头汗。郭富城易啲，因曾合作《踏血寻梅》。但梁朝伟呢，根本推戏多过接戏，又成日自己放假去流浪，享受做个孤独者（Loner）的乐趣。
　　
翁子光设计南江角色时，早早锁定最适合人选为伟仔，故为游说佢，花咗好多时间去建立一段真诚友谊。不过，梁朝伟性格好少鲜明话Yes，结果，翁导演忐忑了一大段日子，都谂住冇机会时，才收到伟仔答应电话，真系畀佢玩残！
　　
讲到导演或监制游说巨星演出，真系各师各法。一般巨星级人马，无论歌星或明星，必定非常之计较。反正大把人揾，所以推Job唔使眨眼。钱为一大考虑，另外，你套戏或音乐会制作，有乜设计先？会否做“坏”我㗎？
　　
所以，制作人要游说巨星Say Yes，真系分分钟“乜都要做”！
　　
例如有位歌星早早处半收山状态，反正对生活质素要求不高，而食唱片版税已够过世，根本就冇兴趣抛头露面再开演唱会。
　　
不过，某制作人乃佢粉丝之外，更肯定歌星若开骚必爆。于是展开死𦧲痴缠功，终于搞掂。
　　
但搞掂之前，讲都唔信，足足要N咁多晚陪歌星到海滩及大自然环境中睇星星，以证明自己诚意十足，终才打动芳心。