【曾智华专栏】夸张拉头马阵容

V型反弹、V型反弹！讲紧乜嘢V型反弹？正是拉头马阵容的V型反弹！

过去两年虽云马照跑，但你知我知，场面冷清到非常吓人。无论沙田或快活谷，只在一个个空空洞洞的马场竞赛，不但毫无气氛，相信作为骑师及马匹，都会非常冇瘾，兼且觉得如此环境跑马，简直好似假假哋。

冇观众，冇宾客，更冇马主。跑完一场，匆匆又跑第二场，人人皱晒眉头，个个戴住口罩唔识笑（今天虽仍有口罩，但个个眼神传出笑意）！

点解近两年养马意欲急降，少咗好多人想做马主？纯经济问题？当然唔系啦。

将心比己，你几百万元买只马返嚟，每月七万元、八万元养马费，为咗乜？儍嘅先会以为只只系“金鎗六十”或“加州星球”。做过马主者，无不知道养马蚀本机会七成。

不过，愿打愿挨，为乜？正为作为马主的虚荣感、优越感。以上两感，来自可以呼朋引类落沙圈指手划脚，扮畀“策骑指示”（大骑师睬你都儍），在朋友面前英明神武。好嘞，若一旦赢马，更发达，威风八面，成棚好友高调冲落凯旋门影头马相，摆个V字手势，然后拍拍骑师膊头赞句：“叻仔！”

老友，由2020年至2022年，以上场面根本冇晒，咁我为乜咁儍，花几百万元做马主呢？好嘞，如今唔同晒嘞，每次跑马，再可威威嘞。尤其做生意的，若有海外伙伴到港，带佢哋入一次场，分分钟又做成另一单大生意！

故此，如今夸张的拉头马阵容频现，好事嚟㗎，愈旺愈多善款，福有攸归！

讲吓今晚先！“谷中王者”何泽尧刚在沙田食白果，开餐时间到！“银进”、“育成精彩”、“正气青驱”、“合伙年代”及“赏心星”皆有W、P机会，捧埋佢做“骑师王”可也！