【曾智华专栏】天生购X狂

今日标题个“X”，可以是书、鞋、袋、车、茶、酒、画、鲍、翅、表……一匹布都写唔完。
　　
我身边的确有好多购“X”狂，例如有一位为报界名人、前老总郑明仁，佢凡出街就孭住个布袋，最喜欢行新旧书局，乐此不疲，凡见新书旧书、新杂志旧杂志，总之睇啱即买。
　　
昨日见佢，阴阴嘴笑：“阿碌，我又买到宝啊！非常笋价，三十皮！”
　　
系乜？正是一本三十年前出版的时事杂志创刊号。见到老郑买书，就似女人买手袋、买鞋，一见喜欢的就会双眼发亮，绝不会谂谂屋企已有几十个手袋、上百对鞋，总之就是情难自禁，买买买，有用冇用、有钱冇钱都买咗先。
　　
事实老友圈皆知，郑明仁的书，多数几世都冇可能睇得完，但佢就似上咗买买买瘾，买到屋企唔够摆，就租地方摆。
　　
摆到上天花板时，就叫老友去攞，全部送。总之送完又买，买完又送，完全为满足一刹那的“买买买”快感。
　　
另有一位也是天生奇人，正是“铺王”B叔。老郑买书就几十蚊啫，但B叔则买铺、买酒店、买楼、买工业大厦……分分钟不是一间间买，而是一幢幢买。冇人完全知道佢买咗几多，结果因一次食饭骾鱼骨入肺，弄至肺炎失救，在毫无先兆下离世，此时才揭下一间，揭下又多一间……哗，原来真系N+N咁多物业！
　　
点解佢揸咗咁多物业？正因早年好景时，B叔凡买必赚，地产代理、银行、律师……见到佢，简直见财神，多多优待。
　　
B叔乃天生购物（业）狂，凡见就买，好景时真系发到唔得掂。不过，2018年嘭的一声社会运动，再来一铺疫情，三只盖又点冚六个樽？接手的后代头大如斗，终于决定狠心跳楼价出货减债，富贵如浮云。