独家丨陈湛文演《废J》有共鸣穷到冇得拣嘢做 袁澧林获提名后终有人听意见

陈湛文（Peter）袁澧林（Angela）首度在ViuTV新剧《杀手废J》合作，无胆杀手“废J”遇上文青女神咖啡店长“曾汶清”，整定连做兵都冇资格。 Peter承认同“废J”几似，同样是生活迫人冇得拣工作，更期望角色被拿来跟周星驰比较，明知输都光荣；而凭电影《窄路微尘》获多项提名的Angela，就自爆最大分别是现在讲意见，终于其他人肯认真听。采访：杜杜 摄影：Stanley 形象:Daniel Cheung(Angela) 发型: Oscar Ngan@Orient 4(Angela) 化妆:Jenny Shih(Angela) 服装:eye’s Buddy feat. VEDI、VERO、Demic_hk、Liberation_hk、New Balance(Peter)

Angela很喜欢《废J》的剧本，试镜时已演得好兴奋。

 

 

Peter对作品好期待，因拍摄过程虽辛苦，但好过瘾。

 

初次跟格仔导演Mike（刘诺衡）及编剧麦可晖为首的“无制限OT编集団”合作，Peter和Angela早于试镜时已劲兴奋。Peter说：“我对个casting已经好期待，可能我哋两个都有睇Mike导以前啲综艺节目，都觉得呢个人几有趣，钟意帮自己打格仔又盛，哈哈！佢系有啲癫癫哋，会令我想认识呢个新一代嘅创作人，癫喺边方面。”而Angela收到试镜两场剧本，已过足戏瘾，“虽然唔知成个故事讲乜，但系净系睇呢两场觉得好似周星驰𠮶啲喜剧嘅感觉，𠮶种无厘头呀、寸呀，我个角色某啲位会用啲好古怪嘅方法做开场白，所以我casting时好过瘾，阿晖同返我对戏，佢写嘢非常厉害，剧本出乎意料哋系职业编剧嘅水准嚟。”

剧中Peter和Angela是邻居，Peter为见女神亦会成日去咖啡店打趸。

 

“废J”连做兵都冇资格

“废Ｊ”之所以废，除了无胆，仲明明生活环境唔多好，依然坚持拣嘢做，Peter都觉得这个设定够搞嘢，“佢系既有得拣亦系冇得拣，就算几冇饭食都觉得自己系有得拣嘅，但系佢冇得拣嘅原因，正正因为佢冇饭开。”他话好明白角色，因同自己好近，但Angela竟然唔信问；“你会唔会呀？！《饭戏攻心》总票房第2嘅电影男星都话冇得拣，咁点算呀？！你分享多啲，系艺术上面选择冇得拣？”Peter就解释是生活上冇得拣，“我冇试过烂尾工作，我只系试过低budget啫！我听我啲同业佢试过啲烂尾工作，咁咪好近囉！呢啲真系冇得呃，就好似你《窄路微尘》都系咁为咗个女先去做，系咪先？！”

Peter在疫情期间工作量大减，试过去教班。

 

Peter演“废J”冇胆又要做杀，穷到冇饭开仲拣嘢做。

 

Peter和Angela首次合作觉得未够喉，因“废J”只是自行性幻想，同女神对手戏唔多，Peter笑言：“摆明系兵嚟，纯FF，仲要FF完，以为自己做咗个好好嘅兵，应该系兵都不如，《沦落人》𠮶款都冇呀，哈哈！可能系，‘咦！掉垃圾呀？系呀！走先 bye bye’ 𠮶种嚟，严格嚟讲系重感情线嘅，但系佢未必见得到𠮶啲。”

 

Angela今次虽然再演靓女，但她认为角色好跳脱，对白亦好有趣。

 

Peter和Angela首度合作，两人都觉得今次对手戏太少唔够喉。

 

望可以同星爷比较

Peter第一次孭飞做剧集男主角，他就借用早前首次孭飞剧集《大诚实家》蔡瀚亿（BabyJohn）接受《头条日报》访问时答案，“佢好似又讲咗我嘅心声，我又系冇乜压力，我哋已经完成咗𠮶个阶段嘅任务，嚟紧就要睇佢出街后观众反应，呢套嘢系几独特，呢种独特有几多人钟意，唔系我哋去主宰，随缘啦！”问到会否叫老婆留意鼻鼾，来测试有冇压力呢？他就搞笑话：“扯唔扯鼻鼾系完全睇我哋凑阿女凑得几攰，哈哈！睇佢玩得我几甘嘅啫！”

早前BabyJohn接受《头条日报》访问，透露首次孭飞剧集《大诚实家》感受。

 

对于《IT狗》、《饭戏攻心》和“废J”都是演毒Ｌ，Peter坦承都不明白为何制作人都爱揾他这类角色，Angela就认为，“你演戏演得好囉！你饰演折、毒好，你能力嚟嘅。”讲到“废J”同周星驰《国产凌凌漆》中角色几类似，Peter就欢迎拿来比较，“如果系就好呀，如果可以同星爷同level秤，秤吖！我输10万丈远都冇问题。”Peter仲打算在星爷社交平台留言，“我前排有个image真系要扮佢，出咗之后我再DM佢，佢可能会话后生仔唔好再步我后尘，自己创新啦！”

 

周星驰在《国产凌凌漆》演特工“凌凌漆”，同样好穷好骑呢。

 

视《废Ｊ》为考牌作

对于《饭戏》票房已荣登香港史上华语片第2位，身为主演之一的Peter，就觉得心态上没转变，因他自觉是掹车边，“我唔会觉得系我担到𠮶个票房，会视之为子华神担到个票房，我坐咗个顺风车，纯粹系太多人爱载子华哥，所以先会咁犀利。”反而《废Ｊ》才算他的考牌作，所以特别期待睇。

Peter认为《饭戏攻心》票房大卖全靠黄子华，自己只掹车边。

 

凭《窄路微尘》先后获金马奖和电影评论学会提名的Angela，最开心听到大量赞赏声，“呢几个月得到前所未有，或者成世以嚟畀人称赞嘅总和，我谂同大家对我嘅期望低有关，我成世喺能力上都冇畀人赞过咁多次，通常赞个头好细，对眼好大，都几开心。”当中前辈黄秋生的称赞，更令她兴奋，“我喺金马奖撞到佢，当刻冇机会直接倾偈，完咗喺酒会，佢就抛下两句，好嘢之类，再话‘有睇你啲嘢㗎’哗！开心到飞起，秋生哥原来喺啲学校分享度话有留意我呢个演员，劲开心！”她就坦承提名后，连其他人的态度都有转变，“提名后有啲嘢系方便咗，例如我分享一啲Artistic feel时，大家会认真啲去看待，一年前讲嘅嘢一样，好似有返一啲重量咁，所以下个project我会尝试表达多啲。”

Angela凭《窄路微尘》获提名女主角，亦令大家更重视她的意见。

 

黄秋生亲自出席金马奖，更凭《白日青春》捧走影帝。

 

新网站 www.stheadline.com 已推出

 

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。