头条戏场丨《隐闭中年》撑住唔好死

《隐闭中年》翻拍自17年在港上映的瑞典电影《想死冇咁易》（A Man Called Ove），曾获第89届奥斯卡最佳外语片提名，身兼《隐》监制及主演的汤汉斯一早𥄫中想重拍。电影正式上映一周场次唔多，如此高质好电影真的不能只有我睇到。剧本生动幽默非常出色，估唔到咁大惊喜，好邻居同屋企有猫的重要性，一套睇到眼湿湿，非常高分的治愈系温情喜剧。(上映中)撰文:廖思慧

因为老婆离世又被炒鱿，Otto觉得做人好苦，所以无时无刻都好想死。

Otto睇咩都唔顺眼长期西面。

一名厌世中年汉Otto(汤汉斯饰)，性格古怪，睇乜都唔顺眼，街坊放狗走去闹只狗、狂轰邻居越线停车、对送货员大吵大闹，无时无刻翻白眼，好听啲叫愤世嫉俗，唔好听正一死废老。不过好彩废老由汤汉斯演绎，佢真系好适合演呢类臭脾气老头子，少少乞人憎再加啲啲可爱兼暗藏善良，有趣又有爱。

Otto每日都会闹爆邻居越线停车。

废老唔钟意同邻居打招呼。

唔好做“猪”呀
饰演牢骚王Otto的汤汉斯对角色有唔同见解，“Otto跟一般顽固老人唔同，佢认为左邻右里若要生活和谐，首先要关心社区状态，每个人先可以好好享受，好好生活。”简单嚟讲，即系唔好做“猪”，关心身边人及事，先可以好好过日子。

想死唔容易
Otto因为丧妻生不如死，每日都想跟埋死鬼老婆一走了之，但次次想死都死唔去，真系命运弄人。汤汉斯为Otto解释，“佢唔想咁快退休，佢唔想老婆咁快离去，佢唔想所有嘢咁快变老… 突然间，佢唔想再面对咁样嘅状态，佢想作个了断，再跟老婆一齐。时间及失去，成为Otto人生最后阶段嘅最大敌人。”

好好活下去
剧本出色之余，饰演Otto的大肚新邻居Marisol (Mariana Treviño饰)亦非常抢眼，多场跟汤汉斯的对手戏睇到又笑又喊，教车一幕紧张加爆笑程度可以纳入教材。因为Marisol 如父女间的爱，令本来相当绝望的Otto重新揾到做人的意义，电影感人之处在于邻里间的温情互动，以及Otto跟爱妻的浪漫回忆。虽然现今世界一地歪理又病态百出，正因为日子唔好过，我哋更应该好好地过。

大肚新移民邻居跟Otto互动搞笑又有爱。

新邻居将囡囡画嘅画送畀Otto，务求用家庭温暖融化他。

Otto手抱嘅系流浪猫，呢个系全片败笔，边可能有咁靓嘅流浪猫呀?

电影成功靠幽默剧本之余，亦全靠Mariana Treviño真诚又出色的表现。

屋企有猫真系好重要，睇吓Otto个样变得几和善。

Marisol 的两个囡囡同Otto相处融洽。

呢幕都好好笑，小丑被打都抵死嘅。

全片最可爱角色​ 。