【曾智华专栏】应发行三十元新钞

未过新十五，当然日日要派利是。每天出外，小弟袋中必有三款利是：一百元、五十元、二十元，已经好多年“唔够胆”派十蚊鸡矣。
　　
派利是派咗四十年，睇住自己心态一路转变。说穿了，就是由唔知点派、唔多愿派，到非常开心又心甘情愿地派，甚至追住人派，不是新年都几乎日日派！
　　
初初的唔知点派/唔多愿派，因每月收入不多，加上公司N咁多同事，参加活动又可能撞到上百生张熟李。若个个派，两三个月人工都唔掂！所以，在公司时，只派畀向我拜年又或有直接工作关系的未婚同事。
　　
大家咪以为唔派利是的已婚者会好乞人憎，原来唔系！在港台工作时，正正有位已婚同事大大声讲：“各位，我绝不会派利是，你哋唔使向我拜年嘞，拜完都冇利是！”
　　
初初啲人听，当然嘴藐藐。不过，一年之后，真系冇人再要求佢派利是。
　　
奉旨唔派后，根据观察，哈，又不觉人缘差咗㖞，过瘾。
　　
我当然唔会咁做，因最想见到大家开开心心。尤其年纪愈大，经济愈改善，愈觉得“派比逗更有福”，故开始周围派。到便利店买报章派，到商场洗手间见清洁阿叔派，见到扫街阿姐又派派派……当然，到任何食肆晚餐更密密派。内容由二十元到一百元都有，视乎环境与关系而定。
　　
昨晚开年，老友肥D提出一个意见，颇有建设性，小弟百分百支持！
　　
“其实金管局应考虑发行三十元纸币，因普罗大众派二十元利是已经N年咁耐，随着历年通胀，颇觉不足。但若一跳跳上五十元，等于‘加价’一倍半，实在极难负担。呢呢，若果有三十元纸币又唔同，立即解决‘肉痛’问题，派与逗都皆大欢喜也！”